Warbixin ay soo saartey hey´ada tirokoobka DST(Denmarks statistisk), ayaa sheegayso in guud ahaan dadka ajaaniibta ah ee kunool wadankaas, ay ka danbiyo badanyihiin dadka wadanka u dhashey, marka loo eego tirada ay wadanka ku joogaan.

Sidoo kale waxaa tirokoobkan lagu ogaaday in generation-ka 2-aad (dhalinyarada wadanka ku dhalatay/ku kortey) ee ajaaniibtu, ay ka danbiyo badanyihiin generation-ka 1-aad(dadka waaweyn). 

Ajaaniibta danbiyada ugu badan gala, ee sida gaarka ah loogu xusay tiroobkan, ayaa waxaa kamid a, ajaaniibta ka timid wadamada, Somaliya, Morokko, Siiriya, Pakistan, Ciraaq, iyo Turkiya. 

Warbixinada ay soo saarto heyádan DST, ee ku aadan danbiyada ajaaniibta, ayaa sanad walba dhalisa muran socdo bilooyin, maadaama xisbiyada dhinaca midigta, ay tirakoobyadan ugu faa´iideystaan sifiican, iyaga oo warbaahinta ka sheeg-sheega. 

FRP oo durbaan tumanaya: 

Siyaasiyiin katirsan xisbiga FRP, ayaa sanadkii hore codsadey in la sameeyo tirokoob cadeynaya danbiyada ay galaan ajaaniibta, iyo waliba wadamada ay kasoo jeedaan asal ahaan.

Maamulka hey´ada tirokoobka dalkan Norway SSB(statistisk Sentralbyrå,) ayaa arintaas ka biyo diidey, iyaga oo sheegay iney ka qeybqaadan karto faquuqa iyo midabtakoorka lagu hayo ajaaniibta wadanka kunool. Sidoo kale waxey sheegeen in diyaarinta warbixinta iyo tirokoob noocaas ah, ay u baahantahay waqti iyo waliba qarash tiro badan. 

FRP oo aad moodo iney markan ka faa´iideysanayaan warbixinta ay soo saardey DST, ayaa sheegay in hadii Norway ay kajirto xaalad Denmark oo kale ah, ay tahay wax laga wel-welo una baahan in wax laga ogaado. 

Harald Tom Nesvik oo ah gudoomiyaha xubnaha baarlamaanka xisbiga FRP, ayaa sheegay in warbixintan ay soo saartey DST ay tahay mid naxdin leh, laakiin aysan aheyn mid lala yaabo, maadaama ay awalba tuhunsanaayeen iney jirto xaalad noocaas ah. Harald ayaa si gaar ah farta ugu fiiqey danbiyada ay galaan dhalinyarada ajaaniibta ah ee wadanka ku dhalatay ama ku kortey(2-Gen..)

Siyaasigan oo katirsan madaxda ugu cad-cad xisbiga FRP, ayaa sheegay in ajaaniibtii ugu horeysay ee Norway timid, ay u baahnaayeen nolol fiican iyo caawin, laakiin kuwii ay dhaleen aysan noqon sidii laga rabay. Wuxuuna sheegay in sidaas darteed loo baahanyah in xog dheeri ah laga ogaado arintaas, si loo ogaado talaabooyinka ugu haboon oo la qaadi karaan, iyo waliba cida ay ku wajahnaan karaan talaabooyinkaas.

Xigasho/kilde: MSN, NETTAVISEN. 

[adsenseyu2]

Warar aan kasoo xiganeyno wargaysyada lokalka ee deegaanka Ringesaker, ayaa sheegaya in shaley duhurnimadii halkaas weerar loogu geystay gabar soomaali ah, laguna gaarsiiyey dhaawacyo culus.  

Booliska Moelv ayaa sheegay in shaley abaare 12.11 duhurnimo, ay heleen fariimo sheegaya, gabar dhiig-baxeyso oo taalo gurigeeda hortiisa. Waxaana mid kamid ah fariimahaas booliska usoo direy isla gabadha ay dhibgu soo gaartey. Booliska ayaa sheegay in markii ay soo gaareen goobta, ay gabadhu miyir qabtey, waxaana loo qaadey isbitaalka iyada oo ay ku yaalaan dhaawacyo waaweyn.

Wargeyska lokalka ah ee Gudbrandsdølen Dagningen, ayaa qorayo in gabadhan ay dhaawacyo waaweyn kasoo gaareen wajiga iyo gacmaha, sidoo kalena ay dhaawacyo fudud ay kasoo gaareen caloosha iyo xabadka.

Talabixiyaha dhinaca xiriirka isbitaalka Sykehuset Innladet, Thorvild Sveen ayaa saxaafada shaley galabtii u sheegay, in xaalada gabadhu ay tahay mid aan gaarsiisneyn heer khatar-nololeed ah, balse ay tahay mid stabile ah oo aysan waxbo iska badalin.  

NorSom News ayaa in gabadhu ay soomaali tahay ka xaqiiqsadey dad soomaaliyeed oo degan deegaanka Moelv.

Lama soo qaban cidii ka danbeysay :

Booliska Moelv ayaa shaley sameeyay howlgalo adag iyo baaritaano, ay ku baadi-goobayaan qofkii ka danbeeyay falkan weerarka ah, laakiin ilaa hada qofna looma soo qaban. Booliska ayaa sheegay ineysan rumeysneyn inuu falkan ahaa mid ku dhacey si kadis ah, waxeyna sheegeen iney hayaan sababo tilmaami kara inuu xiriir ka dhaxeeyay qofka falka geystay iyo dhibanaha. Waxaana ay raaciyeen iney u xog-uruurin ku hayaan asxaabta, qoyska iyo dadka kale ee  ka aghow gabadha dhibku uu soo gaarey.

Madaxa howlgalada booliska deegaankaas, ayaa NRK u sheegay inuu jiro qof goob-joog ahaa oo arkey, qof ku sugnaa aaga uu falku ka dhacay, xiligaa gabadha la weeraray. 

Booliska ayaa dhanka kale sheegay ineysan wali wareysi la yeelan gabadha la weerarey, sababo la xiriira dhaawacyada culus ee soo gaarey.  Waxeyna sheegeen in hadii gabadha ay wareystaan ay u fududaaneyso soo qabashada qofka falka ka danbeeya.

Wargeyska GD ayaa booliska weydiiyey su´aal la xiriirta in gabadha lagu weerary mindi iyo inkale:

Booliska ayaa ka gaabsadey iney ka jawaabaan su´aashaas, sababa la xiriira baaritaanka dhacdada oo wali aan dhamaan. 

XIGASHO/KILDE: GD1,GD2, NRK 

[adsenseyu2]

Booliska magaalada Kristiansand, ayaa galabta shir jaraa´id oo ay qabteen faah-faahin uga bixiyey, meesha uu marayo dadaalka loogu jiro xaqiijinta macluumaadka la xiriiro, dilkii loo heystay A.H.N Yacquub Abdullahi Hassan iyo Tone Ilebekk. 

Booliska ayaa shirkoodan jaraa´id ku sheegay in ilaa hada aysan heynin wax tilmaamayo in dilka labada marxuum ay ka qeybqaateen dad kale oo ka baxsan 15-jirka xabsiga kujiro. Balse waxey sheegeen iney wali wadaan baaritaanka iyo dabadalka fariimaha dadweynaha ee tilmaamaya iney jiri karaan dad kale. 

Waxey sidoo sheegeen iney heleen mindidii uu 15-jirkan u adeegsaday falka dilka ah, iyo waliba DNA- isku xiraya in 15-jirka iyo dilka labada marxuum. Mindida uu wax ku diley ayuu ku tuuray jidka loo maro gurigiisa, oo ah meel cabaar u jirto goobta uu dilka ka dhacay.

Iskuulka ayuu aadey subaxii talaada:

15-jirka norwiijiga ah ee dilka geystay, ayaa la xaqiijiyey in subaxii ka danbeeyay galabta uu dilku dhacay uu joogay iskuulka, waxaana sidaas warbaahinta u xaqiijiyey qaar kamid ah dadka ka shaqeeyo iskuulka uu dhigan jiray. 

Booliska ayaa sidoo kale sheegay iney baaritaan ku sameeyeen aaladaha internetka ee uu isticmaali jirey wiilkan dilka geystay, iyaga oo halkaas kasoo ogaaday inuu Internetka ka baarayay macluumaad ku saabsan sida loo qariyo raadadka dilka, kadib markaad dil geysato.

Yacquub Abdullahi Hassan iyo 15-jirka dilka geystay ayaa isla saarnaa busska, ugana wada dagey maxado aan wax badan ka dheereyn meesha uu dilka ka dhacay. Booliska ayaa sheegay iney kaamerada ku xiran busska kasoo dhex heleen, muuqaalka labada wiil ee wada socodo, daqiiqado kahor falka dilka ah. 

Sabab ayuu dilka u geystay: 

Booliska ayaa sheegay iney fikrad ka heystaan sababta 15-jirkan ku kaliftey inuu dilka geysto, laakiin waxey diideen iney saxaafada la qeybsadaan inta ay kasoo dhamaanayaa baaritaanada wali socda. 

Soomaalida wararka aan la hubin ha joojiyaan:

Waxaa wadanka gees ka gees la isla dhexmarayaa warar kala duwan oo la xiriira, dilka loo geystay  A.H.N Yacquub Abdullahi Hassan, wararkaas oo intooda ah kuwa aanan loo heynin cadeyn. Waxaan dadka soomaaliyeed ee Norway degan, ku haboonaan laheyd iney joojiyaan faafinta wararka aan la hubin, isla markaana ay ka warsugaan booliska ku shaqo leh arintan, ee baaritaanka wado. 

Kilde/xigasho: NRK, FVN, TV2.NO 

[adsenseyu2]

Waxaa maanta oo khamiis ah ka bilaabaneyso maxkamada magaalada Kongsberg, maxkamadeynta nin soomaali ah oo dil u geystay soomaali kale, 13-kii bishii Febraur ee sanadkan 2016. 

Sida uu qorayo wargeyska LaagendalPosten, ninka soomaaliga ah ee loo heysto dilka ayaa da´ahaan jiro sodomeeyo (30), waxaana diyaarinta kiiska dacwadiisu ay soo dhamaatay bishii August ee sanadkan, iyada oo maantana ay bilaaban doonto maxkamadeynta.  Maxkamada ayaa socon doonto mudo laba maalmood ah. 

Marxuuma dhintay iyo ninka dilka loo maxkamadeynayo, ayaa waxaa ka dhaxeysay aqoon hore, sida uu qorayo Laagendal. 

Xigasho/kilde: Laagendal-papiravis( Torsdag 8-12-2016, side 4). 

[adsenseyu2]

Safiirka dowlada Soomaaliya u fadhiyo Qaramada Midoobey Yuusuf Garaad Cumar, ayaa bartiisa uu ku leeyahay Twitterka soo dhigey sawiro iyo qoraal muujinayo kulan uu kala qeybgaley dhaxal-sugaha boqortooyada wadankan Norway, Kronprins Haakon. 

Kulanka ayaa sida uu Yuusuf-Garaad kusoo qorey bartiisa Twitterka looga hadlayay, arimo la xiriira Horumarinta, waxaana lagu qabtey xarunta International Peace Institute (IPI).

Tolow, Yuusuf Garaad fariintii muwaadiniinta Soomaaliyeed ee Norway iyo warqadii codsiga qaramada midoobey ee ku socotay dowlada Norway, maku soo hadalqaadey dhaxalsugaha boqortooyada Norway?.

Xigasho/kilde: Twiter-YGaraad

[adsenseyu2]

Tove Karlsen oo ah qareenka caawinaya qoyska Tone Ilebekk, ayaa saxaafada u sheegtay in Tone la dilay iyada oo isku dayeyso iney wax caawiso. 

Tone oo aheyd hooyo dhashey labo caruur ah, ayaa banaanka usoo baxdey si ay hawo u siiso eygeeda, iyada oo markaas kasoo baxdey shaqada barnehage ay macalimad ka aheyd. Waxeyna kusoo baxdey wax u muuqdey dagaalka labo wiil, waxaana la diley iyada oo isku dayeyso iney wax caawiso. 

Sida uu qorayo VG, wiilka 15-jirka ee dilka qirtey ayaa mindi lasoo aadey Tone, kadib markii ay isku dayday iney wax ka ogaato waxa meesha ka socdo, wuxuuna la dhacay dhowr tooriyood. Baabuurta gar-gaarka deg-dega ayaa Tone iyo Yacquub ka wada qaadey isku meel, waxaana loola cararey isbitaalka, laakiin labadooduba waxey nafbaxeen waxyar kadib. 

Booliska ayaa sidoo kale maanta sheegay in 15 jirka dilka geystay uu wali qabey dhar dhiig leh, markii ay boolisku ku wareysanayeen xaruntooda. Waxeyna sheegeen inuu danbiga dilka Yacquub iyo Tone ku qirtey isla goobta. 15-jirkaan ayaa hada kujiro xabsiga, isaga oo la xiray labo isbuuc oo kumeel gaar ah. 

Booliska ayaa 15-jirkaan iyo dharka uu qabeyba, kasoo ogaadey kamerada ku xiran Busska, maadaama ay busska isla saarnaayeen isaga iyo A.H.N Yacquub Abdullahi Hassan. 15-jirka dilka qirtey iyo Yacquub horey ayey isku yaqaanen , iyaga oo u wada ciyaari jiray hal koox oo kubada cagta ah, islana dhigan jirey iskuul.

15-jirka dilka qirtey ayaa aad ugu xirnaa goob ay ku cibaadeystaaan koox Christian ah, isaga oo sidoo kalena kusoo korey, kana soo jeedo qoys Christian ah. 

Xigasho/kilde: VG, NRK

[adsenseyu2]

Gudoomiye ku xigeenka jaamacada Umada soomaaliyeed Prof. Aden Guuleed shabeel ayaa socdaal shaqo ku imaanayo wadankan Norway, gaar ahaan magaalada Oslo. Waxaana lagu marti qaadayaa dhamaan umada soomaaliyeed ee ku dhaqan Oslo iyo nawaaxigeeda iney kasoo qeybgalaan kulanka soo dhaweynta gudoomiye ku xigeenka J.U.S.

Goobta marti-qaadka: Ankel Hotel, Adresse: Storgata 55, 0182 Oslo

Maalinta: Maalinta sabtida ah ee soo socoto, taariikha: 10.12.2016

Waqtiga: 17:30 til 20:00 

[adsenseyu2]

Wiilkii qirtey inuu ka danbeeyay dilka Yacquub Abdullahi iyo Tone Ilebekk ayaa maanta loo dhaadhiciyey xabsiga, kadib markii shaley la geeyay isbitaalka dadka madaxa ka xanuunsan oo uu xaley ku waabariistay. Waxaana isbitaalka laga soo saarey maanta, isaga si kumeel gaar ah loo xirey labo isbuuc oo ay weheliso in la kontoroolo waraaqaha uu helo iyo cida xabsiga kusoo booqaneyso.

Waxaa maanta lagu wadey in 15 jirkaan lasoo hor istaajiyo maxkamada, balse kama uusan soo muuqan hoolka maxkamada, waxaana taas badalkeeda maxkamada soo xaadirey qareenkiisa.

Wiilkan ayaa shaley qirtey inuu ka danbeeyay dilka labada qof, isaga oo booliska u sheegay inuu kaligii falkaas ka danbeeyay oo ay cidina ku wehelin.  

Xigasho/kilde: TV2

[adsenseyu2]

Wargeyska VG ayaa daqiiqado kahor soo qorey in wiilka 15-jirka ah ee dilka geystay iyo A.U.N Yacquub Abdullahi Hassan ay sanado kahor u wada ciyaari jireen hal koox oo kubada cagta ah, oo ka dhisan magaalada Kristiansand. Waxaana sidaas VG u xaqiijiyey kooxda ay u wada ciyaari jireen labadooduba. 

Booliska ayaa saaka xaqiijiyey in Yacquub iyo wiilka norwiijiga ah ee dilka geystay, ay buss kasoo wada raaceen senterka magaalada, iyaga oo isku meel uga tagay.

Daqiiqado kadibna uu dilka u geystay Yacquub iyo haweeneyda norwiijiga ah. Wargeysyada Intooda badan ayaa qorayo in haweeneydu aysan wax xiriir ah la laheen wiilka dilka geystay, balse ay ku sugneyd meel khalad, saacad khalad ah. 

Booliska ayaan ilaa hada xaqiijin in wax xurguf iyo dagaal  hore ah ay u dhaxeysay Yacquub iyo wiilka dilka geystay, balse waxey sheegeen iney gacanta ku hayaan Mobilkii Yacquub iyaga oo wali baaritaan ku hayo dhacdadan, ayna war kasoo saari doonaan marka ay dhameeyaan. 

15 jirka dilka geystay oo asalkiisu uu yahay norwiiji dhalad ah, ayaa la sheegay in lagu soo koriyey caqiido adag oo Christian ah. Waxaana uu hada kujiraa gacanta booliska, isaga loo dhaadhaciyey xabsiga.

Dhanka kale soomaalida magaalada Kristiansand ayaa sheegtay iney ku faraxsanyihiin in boolisku ay ugu danbeyn soo qabteen qofkii ka danbeeyay dilkan, isla markaana ay ku gudo jiraan xaqiijinta macluumaadka ku saabsan falkan foosha xun ee argagaxa leh.

Mohamed Dalmar Shirwac oo ah gudoomiyaha ururka jaaliyada Kristiansand ayaa sheegay in jaaliyada soomaaliyeed ee deegaankaas ay ka argagaxeen dilkan shaley, laakiin ay maanta xoogaa neefsan karaan, maadaama lasoo qabtey qofkii ka danbeeyay dilkan.

Xigasho/kilde: VG, P4 

[adsenseyu2]

Nin ka agdhawaa goobta uu dilka ka dhacay ayaa sheegay inuu arkey nin ka ordaya meesha lagu diley labada qof, 2 daqiiqo kadib marka uu dilku dhacay. Waxa uuna sheegay inuu arkey nin uu ku qiyaasey labaatameeyo oo isaga oo deg-degsan u ordaya dhinaca kale ee wada uu dilku ka dhacay. Wuxuuna qofkan markhaatiga ah ee la hadley Dagbladet sheegay inuu 100% hubo in qofkaas uu waxa uun ka ogaa dilka. 

Booliska ayaa sheegay in ilaa hada aysan cid kale u qaban dilka labadan qof, marka laga reebo wiil 15-jir norwiiji ah oo qirtey inuu ka danbeeyay dilka labadan qof. Dad badan ayaa su´aal ka keenay awooda uu wiil 15 jir ah u leeyahay inuu mindi ku dilo laba qof.

Booliska ayaa dhan kale dadka ka codsadey iney joojiyaan iney faafiyaan wararka aysan hubin, waxeyna sheegeen in wixii macluumaad xaqiiqo ah ay usoo gudbin doonaan dadka sida ugu dhakhsiyaha badan. Waxey sheegeen in kiiskan uu yahay mid adag oo u baahan baaritaan dheeri ah, soo loo xaqiijiyo dhamaan macluumaadkiisa.

Wargeyska VG ayaa qorayo in wiilka dilka qirtey inuu geystay uu aktiv ka ahaa meel ay ku cibaadeysan jireen koox Christian ah, isla markaana uu wiilku ahaa mid kasoo jeedo qoys Christian go´ay ah. Wiilka 15-jirka ee loo qabtey dilka ayaa ah norwiiji asal ah.

Xigasho/kilde: VG, Dagbladet.

[adsenseyu2]

Dhamaan Mediyaha wadankan Norway, waxey norwiijiga ka dhaadhiciyeen in Amal Aden loo ilaaliyo sababo la xiriiro hanjabaado ay ka hesho soomaalida degan wadankan Norway, waxeyna taas noqotay sheeko si fiican u hirgashay oo Amal ay mar walba sheegi jirtey iney boqolaal fariimood oo hanjabaad ah ka hesho soomaalida degan wadanka Norway. Balse waxaa hada cadaatay in sheekadu ay intaas ka weyntahay oo ay jiraan waxyaalo kale oo aysan Amal dadka u sheegi jirin.

Wargeyska Utrop ayaa saaka soo daabacay maqaal uu ku sheegayo booliska Oslo, ay u xaqiijiyeen in Amal Aden loo ilaaliyo sababo la xiriiro kiis daroogo ku lugleh oo ay ka qeybqaateen qeybo kamid ah asxaabteeda. Wuxuuna Utrop sheegay inuu hayey macluumaad ku saabsan in Amal ay markhaati ka aheyd kiis daroogo ah, sidaas darteed loo ilaaliyo maadaama ay hanjabaad ka hesho kooxahaas daroogada ka shaqeeyo. Waxaa halkaas daaha uga qaadmey waxyaabo qarsoonaa oo Amal iyo Booliskuba aysan saxaafada horey ugu sheegin. 

Utrop ayaa booliska weydiiyay sababta aysan u sheegi jirin in Amal aysan hanjabaad ula kulmin oo kali sababa la xiriira doodaheeda bulshada dhexdeeda ah. Booliska ayaa sheegay in hanjabaadaha la xiriiro Amal ay yihiin kuwo ay adagtahay in la fahmo. Waxaana kamid ah hanjabaada la xiriira iney tahay qof doodyahan-bulsho ah. 

Ilo ka agdhow booliska ayaa Utrop u xaqiijiyey ineysan wax xiriir ah ka dhaxeyn hanjabaadaha ay Amal hesho iyo doodaheeda bulsho. Waxeyna taas la micno tahay in Amal loo ilaaliyo oo kaliya sababaha la xiriira kiiska daroogada ah oo kaliya. Booliska ayaa ka gaabsadey inuu arintaas faah-faahin ka bixiyo. Waxeyna sheegeen iney macluumaad dheeri ah ka bixin karin arimaha la xiriira ilaalinta amaanka qof shaqsi ah. 

Qofka warka ay kasoo xiganayaan Utrop ayaa sheegay in Amal uusan waardiye la socon 24-ta saac ee maalintii iyo habeenkii, balse siyaabo kala duwan loo ilaaliyo. Wuxuu qofkaas raaciyey in Amal ay markhaati fur ka aheyd kiis daroogo la xiriiro oo ay ka qeybaateen dad kamid ah saaxiibadeeda sanado kahor. 

Sida ay qorayaan Utrop ilaa hada majirto qof loo qabtey ama loo xukumey hanjabaad uu u jeediyay. 

Sabtidii lasoo dhaafey ayuu Tv-ga qaranka NRK sheegay in gudoomiyaha gobalka Vest-agder uu baaritaan ku sameeyay eedeyn ay Amal sheegtay in loo diidey iney tagsi kireysato. Laakiin baaritaan lagu sameeyay arintaas, ayaa lagu ogaadey ineysan waxbo kajirin. Amalna waxey qiratay in markaas aan loo diidin tagsi, laakiin waxey soo xigatay dhowr mar oo kale oo tagsi loo diidey. 

Labo maalin kahor ayuu Utrop soo daabacay wiil lagu magacaabo Ismaaciil Xuseen oo sheegay in Amal ay ka been sheegatay isaga iyo wiilal saaxiibadiis ah. Ayna sheegtay iney 40 hanjabaadood ka heshay deegaanka uu wiilkaas ku noolyahay oo gabigiisba ay degenaayeen markaas 10 dhalinyaro soomaali ah. Markii Amal laga codsadey iney sheegto magaca qofka usoo direy hanjabaada ama ay booliska ku dacweyso, waxey Amal sheegtay ineysan waqti u heynin arintaas. Dadka kunool deegaankaas ayaa isla qirey in Amal hadii sheegto mid kamid magacyada dadka usoo direy 40-ka hanjabaadood ay fududaan laheyd in lasoo qabto, maadaama deegaanku uu yahay mid yar oo dadkiisu ay is wada yaqaanaan. Waa hadii aysan been sheegeynine. 

Nasim Rizvi oo kamid ah gudiga ururka ajaaniibta ee gobalka Buskurud, ayaa sheegtay in hadii arintan ay run tahay ay noqon doonto wax laga xumaado, maadaama aysan Amal run ka sheegin sababaha dhabta ah ee la xiriira hanjabaadaha ay hesho. Waxey sheegtay iney Amal heshay kalsooni ku dhisan iney u dagaalameyso jinsigeeda, isla markaana ay hanjabaado ku hesho soomaalida, sababo la xiriiro arintaas.

Rizvi oo sii wadato hadalkeeda ayaa sheegtay in arintan ay tusaale fiican u tahay in si dhab ah loo baaro hadalada kasoo yeero shaqsiyaadka sheegto iney matalaan qowmiyad dhan, kana dhigo iney yihiin dad isku wada mid ah. Waxey sheegtay in wax lala yaabo iney tahay iney adagtahay in su´aal la weydiiyo. 

Thomas Presto oo horey u ahaan jiray gudoomiyaha ururka Afrikan Youth ayaa dhankiisa dhaliil u jeediyay booliska oo sida uu sheegay aan baaritaan fiican ku sameynin hanjabaadaha ay sheegto iney Amal hesho.

Amal Aden godkeeda ayaa biyo ugu galeen:

Amal Aden oo ah gabar soomaaliyeed ayaa sanado badan qori jirtey buugaag ay dhaleeceyn ugu jeedin jirtey bulshada ay kasoo jeedo ee soomaaliyeed. Waxeyna sheegi jirtey in hanjabaado ay ka hesho soomaalida sababo la xiriiro buugaagta ay qorto in jinsigeeda oo ah iney tahay Lesbian. Amal Marna ma aysan sheegin iney markhaati ka aheyd kiis daroogo ah, sidaas darteedna ay hanjabaad heli jirtey. 

Wargeyska Utrop ayaa dabagal ku hayo Amal iyo hanjabaadaheeda, waxaana muuqato in maalmo gudaheeda ay banaanka ku keeneen macluumaad qarsoonaa sanado badan. Utrop wuxuu qabanayaa shaqo ay aheyd in aqoonyahada jaaliyada soomaaliyeed ee Norway, oo aheyd in la xaqiijiyo waxa kajiro hanjabaadaha ay Amal hesho, si loo ilaaliyo sumcada qowmiyada soomaaliyeed ee Norway. Waxaana norwiiiga laga dhaadhiciyey in Amal Aden ay soomaalidu mar walba u hanjabaan, sidaas darteedna soomaalida loo aqoonsadey iney yihiin dad aan ogoleyn in qofku uu xor ahaado oo waxa uu rabo dhihi karo ama qori karo. 

Xigasho/kilde: Utrop

[adsenseyu2]

Booliska magaalada Kristiansand ayaa xaqiijiyey iney wiil 15 jir ah u qabteen dilkii Yacquub Abdullahi Hassan oo Tone Ilebekk. 15-jirkan ayaa markii ay boolisku wareysteen  qirtey inuu isagu ka danbeeyay dilka labada qof.

Sida ay sheegeen boolisku wuxuu wiilkan la qabtey kamid ahaa asxaabta Yacquub. Wax xiriir ahna kama dhaxeyn isaga iyo haweeneyda macalimada ah ee uu la dilay Yacquub.

Shaley ayey gabar soomaali ah oo lagu magacaabo Muno Maalin  journalka FVN u sheegtay iney aragtay Yacquub daqiiqado kahor inta aan la dilin, isaga oo la socdo wiil kale oo cadaan ah(norwiiji u eg, koleyba aan soomaali aheyn sida ay sheegta gabadhan soomaaliyeed). Wiilka hada loo qabtey dilka, ayaa u buuxinaya tilmaanta ay shaley bixisey gabadha soomaalida ah ee degan aaga Yacquub lagu dilay.

Shir jaraa´id oo ay boolisku Kristiansand qabteen ayey ku sheegeen cadeeyeen in Yacquub Abdullahi Hassan iyo wiilka hada la qabtey ay isku buss wada saarnaayeen inta uusan dhicin dilka.

Booliska ayaa shir jaraa´id oo ay shaley qabteen ku sheegay ,iney isweydiinayaan sababta 14-jirkan soomaaliga ah uu ugu soo safrey xaafadan kale ee ka dheer xaafada uu iskuulka ka dhigto.

Xigasho/kilde: NRK

[adsenseyu2]

Booliska magaalada Kristiansand ayaa daqiiqado kahor qabtey shir jaraa´id oo ay uga warbixiyeen, meesha ay marayaan baaritaanka ku aadan falka lagu diley wiilka 14-jirka soomaaliga ah iyo haweeneyda macalimada aheyd.

Booliska ayaa sheegay ineysan ilaa hada aysan jirin qof ay usoo qabteen ama ku tuhunsanyihiin dilka labadan marxuum, balse waxay sheegeen iney heleen warbixino kala duwan, walina ay wadaan baaritaanka. 

Waxeyna sheegeen in ilaa hada aysan wax fikrad ah ka heysan qaabka uu u dhacay falkan iyo inta qof ee ka qeybqaadatay. 

Booliska ayaa sheegay inuu Yacquub Abdullahi Hassan buss kasoo raacey senterka magaalada Kristiansand, isaga oo uga dagey meel aan waxbadan ka dheereyn meesha uu falku ka dhacay. Haweeneyda kale ayaa la sheegay iney banaanka usoo baxdey si ay hawo usoo siiso eygeeda. Sida ay warbaahintu qorayaana wax xiriir ah ama aqoon ah kama dhaxeyn labadan marxuun ee isku meesha lagu dilay. 

A.U.N Yacquub ayaa dhigan jirey iskuul kuyaalo dhinaca kale ee magaalada, lama ogo sababta uu halkaas u joogay xiligaas oo aheyd xili iskuulada laga soo baxey, sida ay boolisku sheegeen. Waxeyna ka codsadeen in hadii ay jirto cid information ka heyso meesha uu yacquub ku socday ama cid uu balan la lahaa iney lasoo xiriiraan booliska. 

Booliska ayaa shirkooda jaraa´id ku sheegay in hadii ay jirto cid warbixin ama macluumaad ka og dhacdadan iney xiriir lasoo sameeyaan. 

Dhanka kale duqa magaalada Kristiansand ayaa sheegay iney heegan buuxo galiyeen shaqaalahooda degmada, si ay ula falgalaan dhacdadan argagaxa ee kusoo biirtey dadka degan Kristiansand. 

Xigasho/kilde: TV2-Shirka jaraa´id ee booliska. 

[adsenseyu2]

Waxaan shaley magaalada Kristiansand lagu dilay wiil 14 jir soomaali ah oo lagu magacaabo Yacquub Abdhullahi Hassan iyo Tone iIebekk oo aheyd haweeneyd 48 jir ah oo macalimad ka aheyd barnehage kuyaalo magaalada.

Sida ay sheegeen warbaahintu wax xiriir ah kama dhexeen labada marxuun ee isku goobta lagu dilay. Ilaa hadana boolisku ma aysan soo qaban cidii ka danbeysay falkan, waxeyna sheegeen iney wadaan baaritaano.

NorSom News ayaa xiriir la sameysay xildhibaan Abdullahi Allason oo kamid ah golaha deegaanka Kristiansand, si aan macluumaad dheeri uga helno falkan argagaxa leh ee soo wajahey jaaliyada soomaaliyeed ee Kristiansand.

Allason, waxa uu sheegay inuusan faah-faahin ka bixin karin dhacdadan, maadaama ay wali socoto baaritaanka ay boolisku wadaan, wuxuuna ka codsadey jaaliyada soomaaliyeed ee kunool Kristiansand, ineysan kahor dhicin inta uu booliski soo saarayo warbixinta ku saabsan falkan. Hadii ay wax macluumaad ah ka hayaana, ay la xiriiraan booliska oo la shaqeeyaan.

 Abdullahi Allason ayaa dhanka ka codsadey soomaalida Kristiansand ineysan wel-welin, maadaama ay wax la qabaan dhamaan umada kunool magaaladaas, dhacdadana ay saameysay labo qoys oo kala duwan oo magaalada kunool.

Kaligeen ma ahan oo labo guri oo kala duwan ayaa laga ooyayaa, sidaas darteed yaanan dhibaatada kaligeen isku soo koobin. Waxaan ka codsanayaa reer Kristiansand iney kasoo baxaan xilkooda oo ay garab istaagaan qoyska uu dhibku soo gaarey, hadii ay wax information ah ay hayaana, ay fiicantahay iney la xiriiraan booliska oo ay  gudbiyaan. 

[adsenseyu2]

Waxaa shaley magaalada Kristiansand mindi lagu diley labo qof oo kala ahaa haweeneyd macalimad ka ah Barnehage iyo wiil 14 jir soomaali ah. 

Booliska Kristiansand ayaa saaka soo saarey macluumaadka labadan qof ee shaley mindida lagu dilay. Waxaana wiilka soomaaliga ah ee geeriyooday lagu magacaabi jirey A.U.N Jacquub Cabdullahi Hassan oo dhigan jiray klasska 9-aad, ahaana 14 sano jir. Halka haweeneyda geeriyooteyna magaceedu uu ahaa Tone iIebekk oo 48 sano sano jir aheyd. Waxeyna Tone aheyd hooyo heysato labo caruur ah. 

Sida ay qorayaan warbaahintu, wax xiriir ah ama aqoon ah kama dhaxeyn wiilkan soomaaliga iyo haweenayda isku meesha lagu diley. 

Boolisku ayaa ilaa hada aan gacanta ku soo dhigin dadkii ka danbeeyay dilkan wuxuushnimada ah, waxeyna wadaan baaritaano waaweyn oo ku raadinayaan dadkii falkan ka danbeeyay. Booliska ayaa ka codsadeen dadweynaha iney xiriir la soo sameeyaan, hadii ay wax macluumaad ah ka hayaan falkan. Sida ay sheegeen booliska waxa xiliga uu falkan dhacayay oo aheyd abaare 16-kii galabnimo, ka agdhawaa goobta uu falkan ka dhacay dad toboneeyo gaaraya. 

Iskuulka uu dhigan Yacquub ayaa maanta lagu sameeyay xus, iyada maamulaha iskuulka uu sheegay in dhamaana ardada dhigata iskuulka iyo macalimiintaba, ay ka argagaxsanyihiin in ardey kamid ah ardadooda maalin cad lagu dilo wadooyinka Kristiansand. Waxeyna sheegeen iney diyaar u yihiin iney caawiyaan, gacana siiyaan familka yacquub ee lasoo daristay xaaladan murugada leh.

NorSom News ayaa isku deyday iney la xiriirto xildhibaan Abdullahi Allason oo ah xildhibaan laga soo doorto deegaanka Kristiansand, laakiin nooma suurtogalin.

Wixii macluumaad ah ee kusoo kordha filka wiilkan, gadaal ayaan kasoo galin doonaa

Xigasho/kilde: TV2.NO, FVN.NO,.

[adsenseyu2]

Dhowr wargeys oo kuwa Oslo kasoo baxo ah, ayaa qorayo in 12-15 dhalinyaro ah oo loo maleynayo iney yihiin Soomaali ama afrikan ka timid woqooyiga ay afrika, ay dhac u geysteeen wiil dhalinyaro ah, ayna ka xoogeen moobil uu heystay.

Booliska Oslo ayaa sheegay inuu xiriir lasoo sameeyay qof goob jooge ahaa oo arkey dhalinyaro 12 ilaa 15 gaaray oo laad la dhacayo wiil kale oo isna dhalinyaro ah. Waxeyna dhacdadan ka dhacdey aaga Dælenenga Oslo. Wiilka uu dhibku soo gaarey ayaa markii danbe  loola cararey legevaktaha, isaga oo markaas miyir beeshan. 

Madaxa howlgalada booliska Oslo, ayaa sheegay in nabarada wiilkan la gaarsiiyey ay yihiin kuwo daran, balse aysan garaneyn halista ay yeelan doonaa. 

Dhalinyarada dhibta geysatay ayaa ka cararey meesha ay wax ku sameeyeen, iyaga oo boolisku uu sheegay iney ku dabo jiraan. 

Booliska Oslo maxey ka faa´iidaan sheegida dhalashada dadka danbiyada geysto:

Markasta oo uu dhib sameeyo qof soomaali ah, ama xitaa loo maleynayo inuu soomaali yahay booliska iyo mediyaha Norway, waxey ku dagdagaan sheegista dhalashada qofka. Waa su´aale maxey ka faa´iidaan ama ujeedo noocee ayay ka leeyihiin.

Sida ku cad qoraalka ay qorayaan wargeysyadu wali ma cada dhalashada dhalinyarada dhibta geysatay, balse waxey qorayaan in la tilaami karo iney soomaali yihiin. Hadeyba sheegayaan dhalashada dadka dhibta geysto, mey sugaan ilaa ay ka xaqiijinayaan?

Xigasho/kilde: Aftenposten-papiravis( 6-12-2016, side 12).

[adsenseyu2]