Golaha ay ku mideysanyihiin masaajidada iyo ururada muslimiinta ah ee Norway(Islamisk råd), ayaa war ay soo saareen ku sheegay inay iska fogeynayaan, ayna canbaareynayaan falkii lagu gawracay macalinka , kadib markii uu ardeydiisa usoo bandhigay sawiro aflagaado loogu geystay nabi Muxamed NNKH. Falkan ayaa ka dhacay dalka Faransiiska.
Samuel Paty oo ahaa macalinka 47-sano jirka ee la gawracay ayaa ahaa macalin dhiga maadada taariikhda, wuxuuna maalmo kahor inta aan la dilin uu ardeyda fasalkiisa tusiyay sawiro farshaxan ah oo loo ekeysiiyay Nabiga. Waxaana qoorta ka jaray ardey asal ahaan reer Jeejniya ah, kaas oo markii danbe ay boolisku toogasho ku dileen.
Cabdiraxmaan Diiriye oo ah gudoomiyaha golaha islaamka Norway ayaa sheegay in falkaas lagu gawracay macalinka uu yahay mid aan shaqo ku laheyn diinta islaamka. Wuxuuna dadweynaha ugu baaqay inaan loo nisbeyn bulshada muslimiinta ah ee Norway ama caalamka kunool. Isaga oo sheegay inay muhiim tahay inaan lagu deg-degin magac u yeelista dhacdadaas, ilaa boolisku ay baariteenkeeda dhameyanyaan.
Diiriye oo asal ahaan soomaali ah ayaa raaciyay inay muhiim tahay in lala wada dagaalamo waxa uu ugu yeeray xagjirnimada, nooc walba oo ay taheyba, iyo dhinac walba oo ay ka timaado.