Sida ay xaqiijiyeen booliska magaaladda Vantaa ee dalka Finland, waxaa dab ka kacay gurigii ay ku noolaayeen ku geeriyooday hooyo soomaali ah iyo afar caruur ah oo ay dashay. Waxaana dabkaas ka badbaaday aabaha guriga oo ay u suurtogashay inuu dabka ka samatabaxo.

Dabka ay ku geeriyoodeen hooyada iyo carruurteeda waxaa urka qiiqa dareemay oo ku soo baxay qoys daris la ah. Waxay boolisku sheegeen in hooyada iyo carruurta ay isla goobta ku dhinteen oo aan lagu gaarin iyaga oo nool, markii ay goobtaas gaareen.

Aabbaha badbaaday ayaa isbitaalka looga daaweeyay dhaawacyo dabka ka soo gaaray isla saakay oo Axad aheyd. Boolisku waxay shegeen in dhammaan qoyska ay u dhasheen Finland balse ay asalkooda ay ka soo jeedaan Soomaaliya.

Dhismaha uu dabka ka kacay waxa uu ahaa guri dabaq ah, qoyskana waxay ka deganaayeen qeybta dhulka.

Sida uu dabka ku bilowday mar ay ka hadleen boolisku waxay sheegeen in uu ka bilowday qolka laysku kululeeyo (sauna) kaas oo laga dhigay meel wax lagu keydsado, waxaana yaalay alaabo dabka degdeg ku qabsankaro.

Qeybaha badbaadada ee gobolka Uusimaa waxay sheegeen in howsha badbaadada ay soo afjareen wax yar ka hor waabarigii. Ilaa 9 qeybood oo ayaa isugu yimid goobta.

Madaxa howlaha samatabixinta ee bartamaha gobolka Uusimaa, Jorma Alho, waxa uu u sheegay warbaahinta Iltalehti in dabka uu guriga wada burburiyay.

Qeybta dambi baristana Otkes waxay sheegeen in ay baarayaan dabka.

Magaalada Vantaa waxay ku taal gobolka Uusimaa ee Finland, waxaana la sheegay in ay ku nool yihiin dadka gaaraya 245,384, waxayna taasi ka dhigeysay in ay tahay magaalada afaraad ee ugu dadka badan dalkaas.

Sida ay xaqiijisay hey adda sirdoonka dalkan Norway ee PST-da, waxaa xabsiga laga sii deyn doonaa gabar dhalinyaro soomaali Norwiiji ah oo xabsiga ku jirtay bilihii ugu danbeeyay, taas oo ku eedeysan danbi la xiriira ka qeybqaadasha falalka iyo kamid noqoshada urur argagaxiso.

PST-da ayaa sheegtay in shuruudihii xabsiga loogu hayay, aysan wali jirin, sidaas darteed ay go aansadeen in xabsiga laga sii daayo. Laakiin eedii iyo dacwadii ka dhanka aheyd ayaa ah mid wali taagan oo socoto, sida ay sheegtay PST-du.

Gabadhan ayaa waxaa xabsiga kula jirta walaasheed oo bishii Maarso ee sanadkan ay dowlada Norway kasoo wada qaaday dalka Siiriya, halkaas oo ay u baxsadeen xili ay da´ahaan kala jireen 16 iyo 19 sano. Waxaa socdaalkooda dib loogu soo celiyay Norway ku weheliyay sadex caruur ah oo ay gabdhahan walaalaha ah dhaleen intii ay ku noolaayeen dalka Siiriya.

Markii ay labaddan gabdhood kasoo dageen garoonka diyaaradaha Oslo, waxaa isla markiiba xabsiga dhigay heya´dda sirdoonka Norway oo garoonka kusii sugeysay. Waxa ayna xabsiga ku jireen ilaa iyo xiligaas. PST-da ayaa hada go aansatay in xabsiga laga sii daayo mid kamid ah gabdhaha, halka ay wali xabsiga kusii jireyso walaasheed dalka isku mar lagu soo celiyay.

Sheekadda labadan gabdhood ee soomaalida ah ayaa caan ka ah Norway, waxaana ay warbaahintu iyo dowladuba wax ka qoreysay tan iyo markii ay ka baxeen dalka, una socdaaleen Siiriya iyaga oo dhalinyaro ah.

Xigasho/kilde: Terrorsiktet Syria-søster løslates

Reysulwasaaraha dalkan Norway Jonas Gahr Støre ayaa ururka Xamaas ee dagaalka kula jira dowlada Israel ku tilmaamay urur argagaxiso. Waana markii ugu horeysay ee Jonas uu Xamaas siiyo magac urur argagaxiso.

Siyaasiyiinta iyo xildhibaanadda dalkan Norway ayaa maanta oo arbaco ah ku shiray hoolka baarlamaanka Norway oo uu ka jiray kalfadhi. Reysulwasaarihii hore ee Norway Erna Solberg ayaa reysulwasaaraha xiliga xilka haya weydiisay booska ay dowlada Norway ka taagantahay qadiyada israel iyo dagaalka cusub uu dhaxeeya ururka Xamaas iyo Israel.

Jonas ayaa intaas kadib waxa uu cambaareeyay weerarka ay Xamaas ku qaaday Israel. Waxa uuna weerarkaas ku tilmaamay inuu ahaa mid jabinayo xeerka dagaalka ee xuquuqul insaanka caalamiga ah.

Reysulwasaaraha ayaa wareysi uu siiyay wargeyska Dagbladet ururka Xamaas ku tilmaamay urur argagaxiso.

Urur qorsheeyay, kadibna fuliyay, qaateyna weerar argagaxiso, waxaa waajib ah in loogu yeero urur argagaxiso.

Norway ayaa door weyn oo dhex-dhexaad ah ka qaadan jirtay dhexdhexaadinta falastiiniyiinta iyo Israel.

Xigasho/kilde: Hamas er en terrorgruppe.

Macalinka xulka kubadda cagta Soomaaliya Rachid Lousteque ayaa Axadii lasoo dhaafay soo bandhigay 35-ta ciyaartooy ee xulka qaranka kubadda cagta Soomaaliya uga qeybgali doono wareega koowaad ee isreeb-reebka koobka kubadda cagta aduunka. Waxaana 35 ciyaartooy oo ku kulmi doono, iskuna diyaarin doono dalka Marooko, kasoo dhexmuuqday Bilal Njie oo ah ciyaaryahan Soomaali Norwiiji ah oo ka ciyaara heerka koowaad ee kubadda cagta norway.

Bilaal oo khadka weerarka garabka uga ciyaara kooxda Haugesund ee horyaalka heerka koowaad ee kubadda cagta Norway, ayaa sheegay inuu isku diyaarinayo inuu kamid noqdo xulka Soomaaliya matali doono ee bisha November ka hortagi doono xulalka qaranka dalalka Algeria iyo Uganda.

Soomaaliya ayuu ka doortay Gambia:

Sida uu qoray wargeyska Haugesund Avis, bishii May ee sanadkan Bilaal ayaa kooxdiisa Haugesund ku wargaliyay inay lasoo wada xiriireen xulalka kubadda cagta dalalka Soomaaliya iyo Gambia. Wuxuuna sheegay inuu doortay Soomaaliya, inkasta oo uusan horey uga soo mid noqon xulalka da´yarta ee Soomaaliya.

Bilaal oo Oslo ku dhashay sanadkii 1998, heystana dhalashada Norway ayaa sheegay inuu doortay u ciyaarista Soomaaliya oo ay hooyadii oo soomaali ah kasoo jeedo, inkasta oo ay xiriir lasoo sameeyeen xulka qaranka Gambia oo uu aabihii kasoo jeedo:

Xiriirka kubadda cagta Soomaaliya ayaa ila soo xiriiray bishii Mai ee sanadkan, si ay i weydiiyaan inaan Soomaaliya u ciyaaro, waana u xaqiijiyay arrintaas. Hada waxaan ka qeybgali doono tababarka la isku uruurinayo kooxda oo isbuucan bilaaban doono. Waana tababar ujeedkiisu yahay in la isku diyaariyo ciyaaraha is-reebreebka oo dhici doono bisha November.

Wax badan kama aqaano xulka qaranka, laakiin marka la isku daro xiisaha ciyaareed iyo inaan matalo dalka, ayaa arrintan ka dhigeyso mid soo jiidasho leh. Waligey horey uma ciyaarin xulka da´yarta qaranka dal, sidaas darteed arrintan waxa ay aniga ii tahay fursad xiiso badan leh. Hadafku waa inaan kamid noqdo xulka ka qeyb noqon doono ciyaaraha is-reebreebka ee la ciyaari doono Bisha November, ayuu Bilaal u sheegay FHK.NO oo ah webka kooxdiisa Haugesund.

Bilaal waxaa la dhashay Moussa Njie oo isna ah ciyaaryahan Soomaali Norwiiji ah oo ka ciyaara heerka koowaad ee kubadda cagta Norway.

Xulka qaranka Soomaaliya ee uu xulay macalin Rachid iyo kooxdiisa macalmiinta ah, ayaa waxaa ka dhex muuqdo tobanaan dhalinyaro ciyaartoy ah oo ku dhashay qurbaha, kana ciyaara horyaaladda kubadda cagta caalamka.

Sida ay boolisku xaqiijiyeen, waxaa meydkiisa la helay Alwan Ahmed Alawneh oo ahaa 46-sano jir Falastiini ah oo heysta dhalashada Norway, kaas oo ku eedeysnaa dilka gabadhiisa oo 8 sano jir aheyd iyo hooyadeed. Booliska ayaa arrintan ku sheegay shir jaraa´id oo ay qabteen saacad kahor.

Arbacadii lasoo dhaafay ayay aheyd markii booliska magaaladda Kristiansand ay sheegeen in guri kuyaal magaaladaas laga helay meydka gabar 8-sano jir ah iyo hooyadeed, waxaana boolisku ay maalin kadib dilkaas ku eedeeyeen Alwan Ahmed Alawneh oo ah ahaa aabaha gabadha 8-jirka ah ee dhimataya iyo hooyadeed oo ay wada joogeen( guur ahaan).

Sida ay wargeysga VG u xaqiijiyeen qaar kamid ah qoyska 46-sano jirkan, hooyada dhimatay iyo eedeysanaha meydkiisa helay ayaa waxaa ka dhaxeeyay xiriir guur ah, waxaana bilihii ugu dambeeyay u socday kala gurasho furiin ah, iyada oo labadooduba ay ku heshiiyeen inay wada korsadaan gabadha ay dhaleen.

Boolisku ma aysan sheegin sababta geerida 46-jirkan, laakiin waxa ay shaaciyeen in ay fariinta geeridiisa la wadaageen dadka ay khuseyso. Sidoo kale waxa ay sheegeen inay fureen gal-kiis oo ku saabsan in la ogaado waxa ku dhacay 46-jirkan oo boolisku Norway ay macluumaadkiisa la wadaageen boolisyada kale ee caalamka.

Dhacdadan ayaa jaaliyadda muslimiinta ah ee magaaladda Kristiansand ku abuurtay argagax xoog leh, waxa ayna noqotay mid aad looga hadalhayo bar-kulanka bulshadda ee deegaanadaas.

Xigasho/kilde: Det var dobbelt­drapssiktede Alwan Ahmed Alawneh som ble funnet død i Kristiansand

Reysulwasaarihii hore ee Norway, hadana ah hogaamiyaha xisbiga Høyre iyo xubin katirsan baarlamaanka Norway, ayaa isbuucyadii ugu danbeysay dhexda uga jirtay dhaleeceyn cusub oo isa soo tarayay. Ubucda dhaleeceyntan ay Erna la Kulmeyso ayaa waxaa sabab ah in ninkeeda Sindre Finnes uu iibsaday lacag badana ka sameeyay saamiyada(share) shirkado ay dowladu leedahay ama dowladu ay saameyn ku leedahay.

Maadaama uu Sindre ahaa ninka reysulwasaaraha, ayaa waxaa shaki la galiyay in marka uu iibsanayo saamiyadaha shirkadaha uu helay xog ka baxsan xogta markaas banaanka taala ee dadweynuhu ogaan karaan. Waxaana mararka qaarkood uu iibsanayay saamiyada shirkado ay dowladu taageero dhaqaale siineysay, kahor inta aan si caam ah loogu dhawaaqin taageeradaas, ama shirkado ay dowladu siineysay heshiis(kontrakt) wax ka iibsasho.

Solberg ayaa marar badan ka war-wareegtay in ay si toos ah uga jawaabto eedeyntaas, waxa ay sheegtay in iyadu aysan ka warqabin iibsiyada saamiyada ee ninkeeda, ayna ku kalsooneyd inuu raaciyay habraacyada uu dajiyay xafiiska reysulwasaaraha Norway.

Xog uruurin laga sameeyay dadweynaha ayaa lagu in wax ka badan kala bar (50%) dadweynaha Norway ay aaminsanyihiin in la joogo in xilka ay isaga degto, iyaga oo arrintaas sabab uga dhigay tuhunka ah eexda lagu tuhumayo inuu ninka qaba Solberg helay, intii ay reysulwasaaruhu joogay.

Solberg ayaa dhankeeda aaminsan in wali ay taageero fiican ku dhex leedahay taageerayaasha Høyre.

Xigasho/kilde: Flere mener Erna Solberg bør trekke seg.

Daraasad lagu sameeyay wasiiradda 126 dal oo caalamka ah oo xilal dowladeed qabtay mudadii u dhaxeysay 1996 ilaa 2021, ayaa lagu sheegay in wasiiradda xilalka ka qabta Norway ay kamid yihiin kuwa ugu waxbarashada yar caalamka, marka laga hadlayo waxbarasho sarre oo jaamacadeed.

Wasiiradda dalalka Norway dariska la ah ee Sweden, Denmark iyo Finland ayaa iyagana la wadaaga Norway in dadka xilalka qabto aysan mar walba aheyn dad aqoon sarre oo jaamacadeed heysta ama shahaado aqoon sarre ah wato.

Dhanka kale wasiiradda dalalka Mareykanka, Spain, Italia iyo Japan ayaa kamid ah kuwa ugu waxbarashada badan caalamka.

Cilmibaarayaasha sameeyay daraasaddan ayaa arrintan ku sababeeyay in dalalka Nordiga aad looga qadariyo ismaamulka dadka, ayna muhiim tahay in qofku uu dhowyahay bulshada, kana soo dhexbaxay. Taas oo lka dhigan in dadka ay iyagu ismaamulaan, intii koox aqoonley ah oo is uruursatay ay maamuli lahaayeen, iyada oo farqiga u dhaxeeyo siyaasiga iyo qeybaha kale duwan ee bulshada uu yahay mid kooban.

Tonje Brenna oo ah wasiiradda waxbarashada ayaa tusaale u ah daraasaddan. Inkasta oo ay heyso jagadaas waxbarashada iyo cilmibaarista la xiriirta, hadana iyadu ma aysan dhameystirin aqoonta sarre ee jaamacadda. Wasiiradda ayaa sheegtay:

Norway siyaasiyiintu waxa ay ku dhowyihiin bulshada, jidka uu qofku siyaasadda ku gali karo ama u mari karo waa mid gaaban, marka lala barbardhigo dalal kale oo caalamka. Waxaan qabaa in arrintaas ay xoojin u tahay dimuqraadiyadeena. In dowladu ay ka koobantahay dad aqoon heerar kala duwan ahna, waa mid wanaagsan. In golaha wasiiradu uu ka koobnaado dad heysta aqoon sarre, xirfad waxarasho iyo khibrad suuqa shaqada ah sida qeybaha kala duwan ee bulshada waa mid wanaagsan ayay wasiiradu sheegtay.

Xigasho/kilde: Norske ministre er de lavest utdannete i verden.

Inkasta oo Norway ay kamid tahay meelaha caalamka ugu horumarsan adeegsiga iyo ku adeegashada aaladda internetka, hadana waxaa jiro boqolaal kun oo Norwiiji ah oo sanad walba qaab farsameysan loogu dhaco baraha internetka.

Daraasad ku saabsan xaqiijinta amaanka baraha internetka oo ay sameysay xarunta xaqiijinta macluumaadka ee NorSIS, ayaa lagu ogaaday in 1,2 milyan qof oo Norway kunool lagu dhacay baraha internetka.

Dadka ugu badan ee internetka lagu dhacay ayaa ah dhalinyaradda ay da´doodu ka hooseyso sodonka(30) sano. Waxaana arrintaas lagu sababeeyay in dhalinyaradu ay inta u bareeraan qaadashada halista la xiriirta adeegsiga internetka, arrintaas oo u nugleyn karto in la dhaco ama lagu khiyaano aaladda internetka.

Xigasho/kilde: 1,2 millioner nordmenn sier de har blitt svindlet på nett.

In ka badan 2,500 oo muhaajiriin ah ayaa dhintay ama la waayey ayaga oo isku dayaya inay badda Meditareeniyaanka uga gudbaan Yurub illaa hadda sanadkan 2023, waxaa sidaas Khamiistii sheegtay hay’adda qaxootiga QM ee UNHCR.

“Illaa September 24, waxaa la tiriyey in in ka badan 2,500 ay dhinteen ama la la’yahay 2023 kaliya,” waxaa sidaas Golaha Ammaanka u sheegtay Ruven Menikdiwela, agaasimaha xafiiska UNHCR ee New York.

Tiradan ayaa dhigan koror weyn oo ku yimid tiradii 1,680 ee dhintay ama la waayey muddadan oo kale ee sannadkii 2022.

«Nolol ayaa sidoo kale ku luntay dhulka, oo aan dareenka dadweynaha ku jeedin,» ayay tiri Ruven Menikdiwela.

Socdaalka dhulka ee waddamada ka hooseeya Saxaraha Afrika, halkaas oo qaar badan oo ka mid ah muhaajiriinta ay ka soo jeedaan, illaa xeebaha laga baxo ee Tunisia iyo Libya «ayaa weli ah mid ka mid ah kuwa ugu khatarta badan caalamka,» ayey tiri Menikdiwela.

Muhaajiriinta iyo qaxootiga «waxay halis u yihiin dhimasho iyo xad-gudubyo xuquuqul insaan, tallaabo kasta oo ay qaadaan,» ayey raacisay Menikdiwela.

Guud ahaan, illaa 186,000 oo qof ayaa badda kasoo galay Koonfurta Yurub, Janaayo ilaa Sebtembar 24, kuwaas oo ka degay dalalka Italy, Greece, Spain, Qubrus iyo Malta.

Badankood, oo ah 130,000 oo qof, ayaa yimid Talyaaniga, taasi oo ka dhigan koror 83 boqolkiiba ah marka la barbar dhigo isla muddadan oo kale ee 2022.

Marka ay noqoto halka laga soo baxo, intii u dhaxeysay Janaayo iyo August ee sannadkan, waxaa la qiyaasayaa in in ka badan 102,000 oo qaxooti ay isku dayeen inay badda Meditareeniyaanka uga soo gudbaan Tunisia, halka 45,000 ay kasoo baxeen Libya.

Qiyaastii 31,000 oo qof ayaa laga soo badbaadiyay badda ama dhexda laga qabtay oo laga soo dejiyay Tunisia, halka 10,600 laga dejiyey Libya, ayey tiri Menikdiwela.

Xigasho/kilde: VOA SOMALI

Booliska dalkan Norway ayaa maanta faafiyay sawirka Alwan Ahmed Alawneh oo ah aabaha gabar sideed(8) sano jir ah oo shaley meydkeeda laga helay guri kuyaal magaaladda Kristiansand. Waxaana sidoo kale isla gurigaas laga helay meydka hooyada dhashay oo lala dilay gabadheeda sideed jirka ah,

Booliska ayaa Alwan oo 46 sano jir ah ku eedeeyay dilka gabadhiisa iyo hooyadeed, waxaana ay boolisku sheegeen in ninkan uu ka baxsaday Norway. Baadigoobna loogu jiro sidii gacanta loogu soo dhigi lahaa, iyada oo lala kaashanayo hey adda booliska caalamka ee interpol.

Ninka dilka ku eedeysan ayaa ah Falastiini heysta dhalashadiisa. Waxaana ay boolisku sheegeen in ilaa hada uu isagu yahay tuhmanaha koowaad ee lagu eedeynayo falkan dilka ah ee loo geystay gabadha yar iyo hooyadeed.

Booliska ayaa dhanka kale sheegay in ay wali wadaan baarinaadda farsamo iyo xog uruurineed ee kiiskan, ayna wixii warbixin dheeraad ah dib kasoo sheegin doonaan.

Xigasho/kilde: 46-åring etterlyst etter dobbeltdrap i Kristiansand.

Hey adda shaqadda iyo kaalmadda dadweynaha ee NAV ayaa bogeeda INTERNETKA kusoo daabacday digniin ay bulshada uga digeyso kooxo burcad ah oo si qaldan u adeegsanayo magaca iyo sumadda(logo) hey´adda NAV, iskuna dayaya inay helaan macluumaadka bankiga iyo dhaqaale ee dadka.

E-mailada ay kooxahan burcadda ah u diriyaan dadweynaha ayaa ah kuwa ay ku wargalinayaan in qofka e-mailka helay uu dhaqaale uga soo dhacay hey´adda NAV, ayna rabaan inuu riixo(klikk siiyo) linki(mareeg) ay usoo direen, uuna halkaas ku buuxiyo macluumaadka koontadiisa bankiga iyo macluumaadkiisa shaqsiyeed.

E-mailadda dadweynaha loo diray ayaa u eg sida ku xusan waraaqda sawirka kore, waxaana loo ekeysiiyay kuwa ay NAV u dirto dadka ay kaalmadda dhaqaale ku taageerto.

NAV ayaa dadweynaha ku wargalineyso in marnaba ay ku dhicin dabinka khiyaanadda ah ee kooxahagan e-mailada u dirayo dadka, waxeya sheegtay in NAV aysan marnaba qofka ka codsan inuu macluumaadkiisa dhaqaale kusoo diro qaab e-mail ah.

Xigasho/kilde: Slår svindelalarm.

Sida ay boolisku xaqiijiyeen waxaa guri kuyaal xaafadda Vågsbygd ee magaaladda Kristiansand ee dalkan Norway maanta duhurkii laga helay meydka 2 qof, waxaana booliska arrintan kusoo wargaliyay qof soo booqonayay guriga laga helay meydka.

Abaare kowdii(1) duhurnimo ayay boolisku sheegeen inay heleen fariin la xiriirto dhacdaddan, waxa ayna markii ay guriga galeen ugu tageen meydka labadda qof oo isla goobtaba lagu xaqiijiyay inay geeriyoodeen.

Shir jaraa´id oo ay boolisku qabteen galabta ayay ku sheegeen in baaritaanadda hordhaca ay ay sheegayeen in meydka labadda qof ee la helay ay yihiin gabar yar oo sideed sano jir ah iyo hooyadeed. Dhanka kale boolisku waxa ay sheegeen in wali aysan cadeyn aqoonsiyada labadda qof ee geeriyooday, ayna wadaan baaritaanadda goobta iyo xaqiijinta aqoonsiyada meydka ay guriga ugu tageen,

Waxeyna boolisku sheegeen in kiiskan ay u baarayaan sidii kiis dil ah oo kale ah, inkasta oo aysan wali cidna usoo qaban falkan ama aysan sheegin cid ay tuhmayaan inay ka danbeeyeen.

Xigasho/kilde: To personer funnet døde i Kristiansand – etterforsker dobbeltdrap.

Hey adda sirdoonka iyo nabad-sugidda dalkan Norway ee PST-da ayaa qabtay, xabsigana dhigtay ardey ajnabi ah, kaas oo lagu eedeeyay inuu ku howlanaa howlo jaajuusnimo, raadiyeyna xogta dowliga ah ee Norway. PST-da ayaa ninkan xabsiga dhigay jimcihii lasoo dhaafay.

Ninkan oo 25 sano jir ayaa ku eedeysay inuu watay qalab lagu dhageysto xogta la isugu gudbiyo mobilada, telefonada, raadiyeyaasha gacanta iyo fariimaha mobilka(SMS). Sirdoonka Norway ma aysan sheegin hey adda ama dalka uu ninkan u jaajuusayay, balse waxey sheegeen inuusan kali ku aheyn howshan oo lagu weheliyay.

Baabuur uu ninkan kireystay ayaa waxaa kaamirooyinka jidadku sawireen isaga oo marayo agagaarka xarunta dowlada, guriga reysulwasaaraha iyo wasaaradda difaaca Norway.

Waxyaaba lagu qabtay ninkan ayaa waxaa kamid qalab kala duwan oo electronic ah, sida USB iyo qalab kale oo computerka loo adeegsado.

Maxkamadda Oslo ayaa ogolaatay in ninkan xabsiga lagu hayo mudo afar bilood ah, waxaana laga cabsaday in dalka uu ka baxsado hadii xabsiga laga sii daayo.

PST-du ma sheegin dalka uu ninkan u dhashay iyo aqoonsigiisa midna. Dhankiisa ma uusan qiran wax danbi ah oo lagu soo oogay.

Xigasho/kilde: Utenlandsk student siktet for spionasje i Norg.

Dowladda Mareykanka ayaa saddex milyan oo dollar dul-dhigtay madaxa sarkaal sare oo ka tirsan kooxda Al-Shabaab, kaas oo magaciisa lagu sheegay, Cabdiqaadir Maxamed Cabdiqaadir oo sidoo kale loo yaqaano (Cikrama).

Barnaamijka abaal-marinta Cadaaladda, Rewards for Justice (RFJ) ee Waaxda Arrimaha Dibedda Mareykanka ayaa qoraal uu soo saaray ku sheegay in $3 milyan la siin doono cid kasta oo keenta akhbaar hoggaamin karta aqoonsiga ama halka uu ku sugan yahay ninkan.

TV2 dalkan Norway ayaa horey u xaqiijiyay in Ikramah uu mudadii u dhaxeysay 2004 ilaa 2008 uu ku noolaa Norway, uuna sidoo kale codsaday heleyna sharciga magangalyada qoxootiga.

Mareykanka ayaa shaaca ka qaaday in Cabdiqaadir Cikrama uu yahay hoggaamiye sare oo ka tirsan Al-Shabaab, islamarkaana soo noqday madaxa howlgallada iyo saadka ee kooxda.

“Barnaamijka Abaalmarinta Caddaalaadda ayaa bixinaysa abaalmarin gaaraysa illaa $3 milyan ciddii keenta xog ku saabsan Cabdikadir Maxamed Cabdikadir.  Cabdikadir waa hogaamiye sare oo Al-Shabaab ka tirsan, waxaana uu soo noqday madaxa howlgallada iyo saadka.” ayaa lagu yiri warbixinta kasoo baxday dowladda Mareykanka.

Waxa kale oo qoraalka lagu yiri “Haddii aad hayso xog ku saabsan ninkan, noogu soo gudbi mid ka mid ah nambarada hoose ku qoran adigo isticmaalaya Signalka, Telegramka, WhatsAppka, ama khadka Tor. Waxaad ku guuleysan kartaa abaalmarin”.

Sidoo kale waxaa warbixinta lagu sheegay in ninkan uu qorsheeyay weeraro dhowr ah, sidoo kalena uu qoray dhalinyaro Kenyaan oo ku biiray kooxda Al-Shabaab.

“Cabdiqaadir waxa uu sidoo kale agaasimay qorshe hore oo weerar oo al-Shabaab. Wuxuu isku duba ridey qorista dhalinyarada Kenyaanka ah inay Al-Shabaab ku soo biiraan oo wuxuuna abbaanduule u ahaa ciidamada Al-Shabaabka Kenyaanka ee ka dagaalama Soomaaliya” ayaa mar kale lagu yiri warbixinta kasoo baxday dowladda Mareykanka.

Waxaa sidoo kale Mareykanka  uu xayiraad saaray hantida ninkan, wuxuuna sidoo kale ka digay in lala macaamilo, maadaama loo aqoonsaday argagixiye caalami ah.

“Dhammaan hantida, iyo danaha hanti, ee Cabdikadir hoos timaadaa xukunka Mareykanka waa la xannibay, guud ahaan shaqsiyaadka Mareykankana waxaa laga mamnuucay inay wax fulin heshiis-ganacsi ah ay Abdikadir la sameeyaan, Taas waxaa dheer, waa dembi in si oggaal ah al-Shabaab loogu fidiyo, ama la isku dayo ama loola shaqeeyo” ayaa lagu yiri.

Mareykanka ayaa horay sidaan oo kale lacago malaayiin ah u dul dhigay xubno kamid ah kooxda Al-Shabaab, waxaana ugu dambeeyay hoggaamiyaha guud ee kooxdaas, ninka lagu magacaabo Axmed Diiriye Cali oo loo yaqaan Abuu Cubeyda, kaasoo mar kale madaxiisa la dul-dhigay abaalmarin lacageed oo dhan illaa $10 milyan oo dollarka Mareykanka ah.

Xigasho/kilde: C.O

Dadka deggan Tuulada Hardheim ee degmada Neckar-Odenwald-Kreis ayaa qaarkood la sheegay in ay muujiyeen cabasho ka dhanka ah nin Soomaali ah oo tahriib ku galay dalka Jarmalka.

Dadka tuulada oo lagu qiyaaso in ay agaarayaan ilaa 7,500 ayaa sheegay in ay ka baqayaan ninkan oo la shaaciyay in uu maskaxda ka xanuunsanayo, waxa la sheegay in ay dhowr mar ka gudbiyeen dacwo dadka ku nool tuulada balse aan wax laga qabanin.

Xeer ilaalinta gobolka ayaa si joogta ah u diidda eedeymaha la xiriira ninkan Soomaaliga ah, marka loo eego xaaladaha caafimaad ee uu ninkan ku suganyahay iyo ra’yiga caafimaadkiisa la xirira, ninka 25-jirka ah ayaa qaba xanuun maskaxiyan ah taasoo la micno ah in aan wax dambi ah loo qori Karin.

Dacwad oogaha guud ee magaalada Mosbach ayaa wargeyska Bild u sheegay in tan iyo bishii May dadka deegaanka ay soo gudbiyeen dacwado badan oo ka dhan ah ninka dhalinyarada ah ee la sheegay in uu ku dhashay magaalada Muqdisho, kuwaas oo isugu jira xatooyo iyo cabsi gelin.

Haddab si aan arrinta ninkaasi dhallinyarada ah wax badan looga laanta afka soomaaliga ee BBC-da ayaa qadka taleefanka kula xiriirnay Axmed Kadiye oo kamida Soomaalida Jarmalka kunool kana mid ah xubnaha ugu firfircoon ee jaaliyadda waxa uuna ka warbxiyay arrintan ka taagan wiilkan Soomaaliga ah ee tahriibka ku galay dalkaasi.

Kadiye ayaa yiri, “ waa uu jiraa wiilkan dhallinyarada ah oo saacdihii lasoo dhaafay waxaa wax ka qorayay warbaahinta maxalliga ah, dadku waxa ay ka cabanayaan waxyeello iyo cabsi gelin ay sheegeen in ay kala kulmayaan, balse Stefan Grimm oo ah duqa tuulada ay dadkeedu dacwoodeen ee Harheim ayaa sheegay ninka laga cabanayo ee Soomaaliga inuusan tuulada degneyn isla markaana uusan ka diiwan gashaneyn, arrinka qaabka loo dhigayana uusan ahayn”.

Isagoo hadalkiisa sii wata ayuu yiri “arrintan waxa ay u muuqan kartaa buun buunin xagga warbaahinta ah iyadoo dhacdooyin badan oo horay loo buun buuniyay ay jireen”.

Tirada codsiyada dadka magangalyo doonka ah ee Jarmalka ayaa dhaaftay 200,000.

Weriyeyaasha warbaahin Bild ee dalka jarmalka ayaa la hadlay dadka tuulada, kuwaas oo si uun isugu dhacay ninka qaxootiga ah ee 25-jirka ah. “Ma jiro qof la kulma ninkan oo ka nabad galay.

«Qaxootigu wuu na aflagaadeeyaa wuuna noo hanjabayaa,” ayay tiri Iris Aschenbrenner oo 43 jir ah.

Beate Hahn oo 56 jir howlgaba ah ayaa tiri «wuxuu inta badan istaagaa gurigayaga bannaankiisa wuxuuna ku hanjabay inuu guriga dab qabadsiin doono, si uu u dilo dhammaan qoyskayaga.»

Haweeneyda ayaa u sheegtay wargayska in ay door bidayso in wiilka ay ayeeyada u tahay u kaxayso tuulada dariska ah si uu ugu ciyaaro, waayo ninku waxa kale oo uu caayaa carruurta ayey tiri.

Si kastaba ha ahaatee, kadib caro ay muujiyeen dadka deegaanka, ayaa booliisku waxay dhawaan weydiiyeen khabiir ku takhasusay baarista si loo ogaado in ninku uu dhab ahaantii khatar ku yahay bulshada.

Haddii la caddeeyo in 25-jirkan Soomaaliga ah uu khatar ku yahay shacabka, waxaa lagu xiri karaa xarumaha dhimirka ee dowladda muddo dheer.

Xigasho/kilde: BBC SOMALI