Xafladda arooska oo ay lahaayeen qoys Soomaaliyeed ayaa ka dhacaysey magaalada Ottawa ee dalka Kanada, xaaladdu waxay ahayd jawi farxad ah, ilaa la gaarey markii la soo dhaweyn lahaa caruuska iyo caruusada oo sacabkii bilowdey, ayaa hal mar la maqley dhawaaqa rasaasta banaanka ka dhacaysa, sida ay goob joogayaal u sheegeen saxaafadda.

Booliska Kanada ayaa sheegay in habeenimadii Axaddu soo geleysey koox hubeysan ay weerar ku qaadeen Xarunta Shirarka Infinity ee Gibford Drive ee magaalada Ottawa, halkaas oo uu ka socdey xaflad aroos.

Sida Boolisku xaqiijiyeen waxaa isla goobtaas lagu diley labo ka mid ah dadkii arooska ka qaybgalay oo lagu kala magacaabi jiray Siciid Maxamed Cali oo 26 jir ahaa iyo Cabdishakuur Cabdi-Daahir oo 29 jir ahaa. Labaduba waxay ka yimaadeen magaalada Toronto. Lix qof oo kale ayaa ku dhaawacmey rasaasta kuwaas oo hadda lagu daaweynaayo Isbitaalka

Taliyaha Booliska Ottawa. Amy Bond ayaa ku tilmaantay toogashada mid naxdin leh, oo aan la aqbali karin. “Waxay dhib ku tahay bulshadeena oo dhan,” ayey tiri.

Amy Bond ayaa sheegtay in ilaa hadda baaritaanka dilka uusan ka soo bixin wax calaamad ah in toogashadu ay tahay mid cunsurinimo ku saleysan ama in dad gaar ah la bartilmaameedsaday. Madaxa bilayska Eric Stubbs ayaa u sheegay warbaahinta isaga oo jooga goobta fal-dembiyeedka galabnimadii Axadda in aanay jirin cid loo qabtay.

Qoyska Siciid Maxamed Cali u sheegeen saxaafadda in aysan garanayn dhib uu geystey ama in uu ahaa bartilmaameed, waxa uu ahaa nin wanaagsan oo shaqeysta ayey yiraahdeen, ma jirto cid ay ilaa hadda farta ku fiiqeen.

Waa mid kamid ah dilalkii ugu foosha xumaa ee ka dhacaa dalkaas iyada oo lagu jiro xaflad aroos in ay ku dhamaatey dhiig iy dhaawac.

Saddex nin ayaa loo xiray mudaharaad rabshado wata oo ka dhacay dalka Sweden ka dib markii dalkaasi mar kale lagu gubay kitaabka Qur’aanka.

Rabshadaha ayaa dhashay kadib markii nin asalalkiisu yahay oo u dhaq dhaqaaqa Islaam naceybka oo lagu magacaabo Salwaan Momika uu dab qabadsiiyay kitaabka Quraanka galabnimadii Axadda.

Booliska ayaa sheegay in ay xireen 10 qof oo ay ku eedeeyeen in ay khalkhal galiyeen xasiloonida guud ee magaalada Malmo.

Dhowr baabuur ayaa gubtay kadib markii dad ku dhow boqol qof ay isugu soo baxeen si ay uga jawaabaan gubista Quraanka.

Salwan Momika ayaa Qur’aan ku gubay gobolka Varnhemstorget oo ah aag ay Muslimiintu ku badan yihiin galabnimadii Axada. Waxa uu hore ugu gubay qur’aanka kariimka ah, mudaharaadyo is daba joog ah oo ka dhan ah diinta Islaamka, waxana falka uu ku kacay uu ka dhaliyey caro dublamaasiyadeed guud ahaan bariga dhexe.

Xigasho/kilde: BBC

Sabtidii waxaa bartamahaa magaaladda Bergen ka dhacay isku dhacyo waaweyn oo sababay inay istaagaan isku socodka gaadiidka dadweyne ee ka dhex shaqeeyo gudaha magaaladda Bergen. Isku dhacyadan oo isku badalay gacan ka hadal rabshado wata, ayaa waxa uu dhexmaray kooxo kala duwan oo Ereteriyaan ah oo isku maandhaafsan siyaasadda dalka Ereteriya.

Kooxahana kala duwan ee isku dhacu uu dhexmaray ayaa kala ah: Koox taageersan nidaamka madaxweynaha mudadda dheer heystay xukunka Ereteriya ee Isaias Afewerki, iyo kooxo mucaarad ku ah. Waxa ayna rabsho noocan oo kale ah horey uga dhaceen dhowr dal oo Yurub ah.

Kooxda banaanbaxa soo abaabushay ee mucaaradka ah ayaa isku dayay inay baajiyaan kulan ay qabsan rabeen kooxda taageersan madaxweynaha dalkaas, kaas oo xus loogu sameynayay maalintii uu soo bilowday halganka lagu xoreeyay dalka Ereteriya oo markiisii hore qeyb ka ahaa dowlada Ethiopia. Kulan ayaa ugu danbeyn u dhacay sidii loo qorsheeyay, inkasta oo kooxda mucaaradka ah ay dadaal xoogan u gashay in la baajiyo, waxaana ilaalo xoogan ka hayay booliska.

Booliska magaaladda Bergen ayaa shaley si xoogan uga qeybqaatay kahortaga inay rabshadahan ku fidaan magaaladda, ayna geystaan khasaaro maaliyadeed ama nafeed. Waxaana la cadeeyay in hey adda sirdoonka dalkan Norway ee PST-du, ay booliska gacan ku siisay daminta iyo ka hortaga gacan dibax-baxa gacan ka hadalka isku badalay ee shaley ka dhacay Bergen.

Booliska Bergen ayaa dacwad kusoo oogay dhowr qof oo qaarkood lagu eedeeyay inay geysteen gacan-qaad, halka kuwo kalena ay dhagax ku tuureen booliska.

Reysulwasaaraha Norway oo ka hadlay arintan, ayaa ku tilmaamay in wax aan loo dulqaadan karin ay tahay in dhacdo noocan oo kale ah, ay ka dhacdo gudaha Norway.

Xigasho/kilde: Siste nytt om opptøyene i Bergen

Hey adda gaadiidka iyo wado-marista Norway ee statens vegvensen ayaa isbuuca danbe guud ahaan dalka oo dhan ka sameyn doonto baaritaano lagu hubinayo in dadka saaran buss-aska gaadiidka dadweynaha ay xiranyihiin suunka baabuurka.

Hey adda ayaa sheegtay in qofkii lagu qabto isaga oo aan xirneyn suunka buss-ka, aysan muraamarsiiyo u noqon dooniN inuu ilaaway, ama uusan caado/dhaqan u laheyn adeegsiga suunka baabuurka. Waxeyna hey adda dhamaan dadweynaha ku boorineysaa adeegsiga suunka oo qofka ka badbaadin kara dhaawac xoogan, hadii uu shil gaari ku imaado.

Suunka busska waxa uu si fiican qofka ugu hayaa kursiga, si qofku uusan khatar ugu naftiisa ama dadka kale, wuxuuna yareeyaa khasaaraha qofka ku imaan kara ama uu geysan karo, hadii uu shil dhaco, ayaa lagu sheegay war qoraal ah oo kasoo baxay hey adda.

Xigasho/kilde: Storkontroll av beltebruk i buss neste uke.

Afar qarax ayaa saacad gudaheed ruxay magaalooyin ku yaalla dalka Sweden, sida ay booliska sheegeen, ayada oo dalka uu la tacaalayo sare u kaca rabshadaha la xiriira burcadnimada.

Abaare 1:00 am, booliska magaalada Gothenburg ayaa helay warbixino ku saabsan laba qarax oo ka kala dhacay laba guri oo kala duwan, oo ay u dhaxeysay 10 daqiiqo.

“Labada goob-ba waa la xiray, waxaana socda baaritaano,” ayey booliska yiraahdeen ayaga oo intaas ku daray in khubarada bamka loogu yeeray goobta.

“Ma jiraan wax warbixino ah oo ku saabsan dad dhaawacmay, kaliya qalab ay waxyeello gaartay,” ayey yiraahdeen booliska.

Saacad kadib, laba qarax oo ay daqiiqado u dhaxeysay ayaa ka kala dhacay magaalada Norsborg ee duleedka koonfureed ee Stockholm iyo magaalada Nykoping, oo 100 km koonfur ka xigta caasimadda.

Labada kiisba, booliska waxay sheegeen in cidna aanay wax ku noqon. Dhammaan afarta qarax ayaa ka dhacay dhismooyin ay shacab degan yihiin.

Sweden ayaa sanadihii dhowaa la tacaaleysay inay xakameyso toogashooyinka iyo bambooyinka, ayada oo burcad uu ka dhaxeyo dagaal ganacsi daroogo ay kala aargudanayaan.

Hase yeeshee booliska Gothenburg ayaa AFP u sheegay inaan weli la go’aamin sababta ka dambeysay labad qarax ee ka dhacay magaalada.

Sanadkii 2022, Sweden waxaa ka dhacay 90 qarax, iyo 101 kiis oo isku day qaraxyo ama diyaarin ah, sida ay sheegeyso xogta booliska.

Sannadkan illaa 15-kii August, waxaa la diiwaan geliyey 109 qarax.

Booliska ayaa horey u sheegay in bambooyinka inta badan loo adeegsado in lagu cabsi geliyo bartilmaameedyada, halka toogashooyinka loo adeegsado in lagu dilo loogana takhaluso cadowga.

Dalka ayaa laga diiwaan geliyey 391 toogasho 2022, kuwaas oo 62 ka mid ah ay ahaayeen dhimasho, taasi oo 45 boqolkiiba ka sarreysa sanadkii ka horreeyey, sida ay ku warrameyso xogta booliska.

Xigasho(kilde: C.O

Gabdhaha Muslimiinta ah ee wax ka barta Faransiiska ayaa laga mamnuucayaa xirashada cabaayadaha oo ah dhar waaweyn oo astur ah, waxaana la qorsheynayaa in laga mamnuuco dugsiyada ay maamusho dowladda Faransiiska, sida uu sheegay wasiirka waxbarashada.

Sharciga ayaa la qorsheynayaa in la dhaqan geliyo isla marka sanad dugsiyeedka cusub uu billowdo 4ta Sebtembar.

Faransiiska ayaa si adag uga mamnuucaya calamadaha diiniga ah dugsiyada dowladda iyo xarumaha dowladda intaba, iyaga oo ku doodaya in ay xadgudb ku tahay shuruucda cilmaaniga ah.

Xirashada xijaabka ayaa mamnuuc ka ahayd dugsiyada dowladda ay maamusho tan iyo 2004-kii.

«Markaad gasho fasalka, waa inaadan aqoonsan karin diinta ardayda adigoo eegaya kaliya,» Wasiirka waxbarashada Gabriel Attal ayaa u sheegay TV-ga Faransiiska ee TF1, isagoo raaciyay: «Waxaan go’aansaday in cabbaayadaha aan la gashan karin hadda xilliga waxbarashada iskuulka.»

Tallaabadan ayaa timid kadib dood bilo ah oo ku saabsan xirashada cabbaayadaha ee iskuullada Faransiiska.

Dharka noocani ah ayaa si aad ah ugu soo badanaya iskuullada, taas oo keentay kala qaybsanaan siyaasadeed oo iyaga ku saabsan, iyada oo xisbiyada garabka midig ay dabada ka riixayaan in la mamnuuco halka kuwa bidixda ay walaac ka muujiyeen xuquuqda haweenka iyo gabdhaha Muslimiinta ah.

«Cilmaaniyaddu waxay ka dhigan tahay xorriyadda lagu xorayn karo dugsiyada waxbarasho,» ayuu Mr Attal u sheegay TF1, isagoo ku dooday in cabbaayadda ay tahay «tilmaan diimeed.

Waxa uu sheegay in uu sharci cad oo heer qaran ka soo saari doono kahor inta aan dugsiyada la furin fasaxa xagaagan kadib.

Faransiiska ayaa dhaqan geliyey mamnuucid adag oo lagu soo rogay calamadaha diinta ee dugsiyada tan iyo qarnigii 19-aad, oo ay ku jiraan calaamadaha Masiixiyiinta sida , si loo xakameeyo saamaynta Katooliga ee waxbarashada dadweynaha.

Xigasho: BBC-SOMALI

Hey adda caafimaadka bulshada Norway ee FHI ayaa sheegtay in loo badinayo in Norway uu soo gaaray, uuna wareegayo nooc cusub ah oo Corona ah, kaas oo dhawaan lagu arkay dalka Sweden.

Noocan cusub oo loogu magac daray BA. 2.86 ayay hey addu sheegtay inuu wax badan ka duwanyahay noocyadii hore ee feyruska Coronaha ee horey loo yaqaan. Balse uu waxyaabo badan kala simanyahay noocyadii hore ee korona ahaa.

Karoline Bragstad oo katirsan hey adda FHI ayaa sheegtay: Noocan cusubi wali sheybaar ahaan Norway laguna arkin, laakiin waxey u badantahay inuu soo gaaray Norway, uuna wareegayo. Waxaan sii wadi doonaan baaritaanadda aan wadno, si aan cadeyno in noocan cusub ee feyruska corona ah uu soo gaarsy Norway. Waxaana kasoo saari doonaan warbixin danbe, hadii noocas feyruska ah la cadeeyo inuu Norway soo gaaray.

FHI ayaa dhanka kale sheegtay in xiliga la filayo in dadweynaha Norway ay difaac fiican ka heystaan saameyn xoogan oo ka dhalata feyruskan cusub, sida xanuun xoogan ama dhimasho, balse ay tahay in marka hore la sameeyo baaritaano hordhac ah.

Xigasho/kilde: FHI: Sannsynlig at ny coronavariant er i omløp i Norge.

Sida ay qorayaan qaar kamid ah warbaahinta dalkan Norway, dowlada Norway ayaa dalka Ukraine u balanqaaday diyaaraddaha dagaalka ee F-16, xili uu reysulwasaaraha dalkan Norway booqasho ku joogay dalka Ukraine.

Norway ayaa ku biireyso dalal dhowr ah oo qaaradda Yurub kuyaal, kuwaas oo oo Ukraine u balanqaaday inay siinayaan diyaaraddaha dagaalka ee F-16. Horey dalalka Holland iyo Denmark ayaa u sheegay inay Diyaaradaha F-16 siin doonaan dalka dagaalka kula jira Ruushka ee Ukraine.

Reysulwasaaraha dalkan Norway, Jonas Gahr Støre ayaa khamiistii isbuucii hore booqasho ku tagay dalka Ukraine, Waxa uu xaqiijiyay in dowladiisu ay mar kasta garab istaagantahay dowlada iyo shacabka Ukraine.

Xigasho/kilde:  Norge gir F-16-fly til Ukraina.

Dowlada dalka Denmark ayaa ka fakareyso in isbadal lagu sameeyo dastuurka dalkaas, si loo mamnuuco gubitaanka kitaabta diiniga ah, sida quraanka kariimka, kitaabka tawraadka iyo kutubta kale ee diiniga ah.

Dastuurka dalka Denmark ayaa waxaa kamid ah qodob qeexan oo mamnuucayo in la gubo calamadda dalalka kale, balse dowlada ayaa rabta in qodobkaas la balaariyo, laguna daro mamnuucista kutubta diiniga ah.

Peter Hummelgaard oo wasiirka cadaaladda dalka Denmark ayaa sheegay in gubitaanka quraanku uu yahay wax ijaafo ah oo aan wax micno ah sameynin. Sidoo kale wuxuu sheegay in gubitaanka quraanku uu halis galinayo Denmark iyo danaha ay dowlada dalkaas ka leedahay aduunka, sidoo kale uu khatar amni galinayo badqabka dadka u dhashay Denmark ee ku sugan caalamka.

Dalalka Sweden iyo Denmark waxaa isbuucyadii ugu danbeeyay ka jirtay cabsi amni oo la xiriirta weeraro argagaxiso oo ka dhici karo dalkaas, maadaama kooxda Al-Qaacida ay soo saartay fatwo qaraxyo argagaxiso looga geysto dalalkaas, maadaama lagu gubay kitaabka quraanka kariimka ah.

Xigasho/kilde: Vil forby koranbrenning i Danmark.

Sida ay xaqiijiyeen booliska Oslo, ardey jaamacadeed oo labaatameeyo(20+) jir ah ayaa lagu soo oogay dacwad isku dil ah, kadib markii uu mindi ku dhaawacay labo macalin oo wax ka dhiga jaamacadda Oslo. Falkan ayaana ka dhacay gudaha mid kamid ah qolalka jaamacadda Oslo.

Labadda macalin ee la dhaawacay ayaa mid kamid ah waxaa soo gaaray dhaawac xoogan, halka kan kalena uu dhaawac fudud soo gaaray sida ay boolisku xaqiijiyeen.

Sida ay xaqiijiyeen ilo wargal ah oo warbixin siiyay NRK, ardeyga jaamacadeed ee falalka dhaawacyada ah geystay ayaa dhawaan ku dhacay imtixaanka jaamacadda. Waxaana la xaqiijiyay in ardeyga eedeysanaha ah uu kulan dhex-maray labadda macalin ee uu dhaawacay, kahor inta uusan mindida galin.

Ardeygan ayaa hada ku eedeysan isku dey dil iyo inuu geystay dhaawac jir ah.

Sida uu xaqiijiyay maamulaha jaamacadda Oslo, falkan ayaa noqonayo kii ugu horeeyay ee noociisa ah ee ka dhacay ee ka dhacay gudaha jaamacadda. Waxaana hada dib u eegis lagu sameyn doonaan nidaamka ilaalinta amniga jaamacadda .

Xigasho/kilde: Mann siktet for drapsforsøk etter knivstikking på universitet.

Hoggaamiyaha kooxda Wagner ee Ruushka, Yevgeny Prigozhin ayaa ku jiray liiska rakaab saarnaa diyaarad gaar loo leeyahay oo caawa ku dhacay waqooyiga magaalada Moscow.

Mas’uuliyiinra Ruushka ayaa sheegay in cidna aysan ka bad-baadin “shilkan”.

Weli lama si rasmi ah looma xaqiijin in Prigozhin uu saarnaa diyaaradda, hase yeeshee bogag ay leeyihiin taageerayaasha Wagner ee Telegram-ka ayaa lagu sheegay inuu geeriyooday.

Waxay ku eedeeyeen dowladda Ruushka inay diyaaradda kusoo ridday gantaal.

“Waxaa la billaabay baaritaan lagu sameynayo diyaaradda Embraer ee caawa ku dhacday gobolka Tver. Sida ku cad liiska rakaabka, waxaa ka mid ah Yevgeny Prigozhin,” waxaa sidaas tiri hay’adda socdaalka Ruushka ee Rosaviatsia, oo ay soo xigatay wakaaladda wararka Ruushka ee TASS.

Wasaaradda xaaladaha deg degga ah ee Ruushka ayaa bayaan ay soo saartay ku sheegtay in diyaaradda gaarka loo leeyahay ee Embraer Legacy ee ka safartay Moscow kuna socotay St. Petersburg markii ay ku dhacday xaafadda Kuzhenkino ee u dhow gobolka Tver.

Waxay sheegtay in 10 qof ay saarnaayeen diyaaradda, oo ay ku jiraan saddex shaqaalaha diyaaradda ah. Sida ay sheegeyso xog horudhac ah, dhammaan dadkii diyaaradda saarnaa waa ay geeriyoodeen.

Prigozhin, oo 62 jir ah, ayaa horkacay kacdoon ka dhan ah hoggaanka sare ee Ruushka 23-24-kii June, kaasi oo madaxweyne Vladimir Putin uu sheegay inuu Ruushka qarka u saaray dagaal sokeeye.

Kacdoonkaas ayaa waxaa lagu dhameeyey heshiis Kremlin-ka ku ogolaaday in Prigozhin uu dego dalka deriska ah ee Belarus. Hase yeeshee wuxuu u muquday inuu si xor ah ugu dhaq-dhaqaayey gudaha Ruushka.

Prigozhin oo doonayey inuu rido wasiirka difaaca Ruushka Sergei Shoigu iyo madaxa ciidamada Valery Gerasimov ayaa Isniintii baahiyey muuqaal uu ku sheegayo in lagu duubay Afrika.

Xigasho: S.A