Maanta oo arbaco ah, waxaa lagu wadaa in Norway ay kasoo dagaan 33 qoys oo Siiriyaan ah oo dowlada Norway ay kasoo qaadaneyso dalka Giriiga, si dib u dajin loogu sameeyo. 33-dan qoys ayaa kamid ah isku dar 50 qoys oo ay Norway horey u balanqaaday inay kasoo qaadeyso xerada qoxootiga ee Moria ee dalka Giriiga.
Norway ayaa horey u sheegtay in sababta ay qoxootigan Siiriyaanka ah uga soo qaadeyso Giriiga, ay tahay inay yihiin qoysas nugul oo caruur heysta, kuwaas oo ay u badantahay inay Norway ka helaan magangalyo. Waxaana lagu wadaa in kiisaska codsiga magangalyada qoysaskan go´aan looga gaaro mudo sadex isbuuc gudahood.
Wargeyska VG ayaa qoray in 17-ka qoys ee dhiman Norway loo soo qaadi doono isbuucyada soo socdo, dib u dhaca ku yimidna ay sabab u tahay xanuun laga helay xubnaha qoysaskaas qaarkood.
50-kan qoys ayaa kamid ah isku dar 3.000 qof oo qoxooti ah oo ay Norway qorsheysay in sanadkan ay kasoo qaadato xeryaha qoxootiga caalamka, ayna u sameyso dib u dajin.