Falanqeyn:Farqiga u dhaxeeyo xukuumadaha wadamada Denmark iyo Norway iyo fal-celintooda codsiga qaramada midoobay

Dowlada Denmark ayaa isbuuc kahor soo saartey war saxaafadeed ay ku sheegeyso iney dib uga noqotay go´aankii ku saabsanaa dib u qiimeynta sharciyada magangalyada qoxootiga soomaaliyeed ee wadankaas kunool. 

Waxaana sida muuqato ay arintaas timid kadib markii hey´ada qaramada midoobay u qaabilsan xuquuqda qoxootiga ee UNCHR, ay canbaareysay go´aanka dib u qiimeynta iyo dib u celinta qoxootiga soomaaliyeed ee wadankaas magangalyada weydiistay. Iyada codsatay inaan qoxooti soomaaliyeed dib loogu celin wadankoodii, maadaama xaalada amni ee Soomaaliya aysan wali noqon mid si buuxdo u caga-dhigatay. Halkan ka akhri canbaareynta qaramada midoobay. 

Isla qaramada midoobay ayaa bishii November ee sanadkii hore ee 2016, warqad noocaas oo kale ah usoo dirtay dowlada dalkan Norway, oo iyadana dhankeeda soo saartay go´aan ku saabsan dib u qiimeynta magangalyada qoxooti soomaaliyeed oo 1600 gaaraya. Dowlada Norway ayaa u muuqata mid aan ilaa hada dhag jalaq u siin codsigaas qaramada midoobay, ama aan wali kasoo saarin jawaab ay ku cadeynayaan mowqifkooda rasmiga ah ee ku aadan arintaas. Marka laga reebo hadalo duul-duul ah oo ay sheegayso wasiirada arimaha soo galootiga Sylvi Listhaug.

Su´aasha la isweydiin karo ayaa ah, maxaa sababi kara in Denmark ay durba ka fal-celiso codsiga qaramada midoobay, Norweyna ay dhagaha fureysaneyso ilaa hada. Jawaabta su´aashaas waxaa laga heli karaa qaab dhismeedka xukuumadaha labada wadan xiligan ka taliya oo kala duwan. 

FRP VS Dansk-Folkeparti: Midna xukuumadu ayuu kujiraa, kan kalena xukuumada ayuu taageeraa. 

Booska FRP ee Denmark ama SD(sweden), waxaa kujiro xisbi midigta fog ah oo lagu magacaabo Dansk Folkeparti. Waana xisbi siyaasadiisu ay FRP kasii xagjirto mararka qaarkood, marka la eego qaabka ay siyaasiyiintuusu u hadlaan. Inkastaa ay doorashadii ugu danbeysay noqdeen mid kamid ah xisbiyada Denmark ugu waaweyn kadib markii ay heleen codad aad u badan, hadana Dansk Folkeparti kama mid aha xukuumada wadankaas hada ka taliso ee ka kooban xisbiyada Venstre, De Konservative iyo Liberal Allianse. Taas badalkeeda, waxey doorteen iney xukuumada sadexdaas xisbi ay taageero siiyaan si ay aqbaliyad u helaan. DF waxey joogaan booska KRF iyo Venstre ee Norway.

Inkastoo sadexdaas xisbi ee hada Denmark ka taliya ay wataan siyaasad adag oo ku wajahan qoxootiga, hadana inuusan Dansk Folkeparti kamid aheyn xukuumada wadankaas, waxey sababtay ineysan saameyn balaaran ku laheyn fulinta go´aamada dowlada marka laga reebo taageero siin ama taageero kala noqosho. 

Si ka duwan DF iyo Denmark, FRP wuxuu kamid yahay xukuumada hada Norway ka taliso oo ay ku bahoobeen Høyre iyo iyaga(FRP). Waxeyna gacanta ku hayaan oo ay maamulaan wasaaradaha ugu muhiimsan ee saameynta ugu balaaran ku leh siyaasada soo galootiga iyo noloshoodaba. FRP waxey ka taliyaan wasaaradaha Cadaalada iyo dastuurka, iyo waliba wasaarada soo galootiga iyo isdhexgalka bulshada. Wasaarada cadaalada waxaa hoostaga oo ay shaqadooda jaan-gooyaan hey´adaha UDI iyo UNE. Taas oo u sahleyso iney fuliyaan go´aamada ay rabaan ama ay sida iyaga la quman u fasirtaan sharciyada iyo xeerarka dowlada. Waxaana dhabarka danbe ugu ganban oo difaacaya Høyre oo dowladu ku bahoobeen, iyaga Venstre iyo KRF oo taageero siiyo. 

FRP waxey sida muuqato ku fashilmeen fulinta inta badan balan-qaadyadii ay sameeyeen doorashadii 2013. Sidaas darteed waxey rabaan iney sida ugu fiican uga faa´iideystaan cabsida sii kordheysa ee dadka norwiijigu ay ka qabaan soo galootiga, gaar ahaan kuwa ka imaanaya wadamada islaamka. 

 

legg igjen kommentar/ ka dhiibo fikirkaaga

Bli den første som kommenterer/dhiibo fikirkaaga

Notify of
avatar
wpDiscuz