(Maqaal)-Cabdiraxmaan Jaamac: Dhibku ma ahan inaan lacag dirno, ee waa in shaqadeenu ay yartahay

Waxaan maanta shaqada kadib soo marey maqaaxi soomaaliyeed oo kutaal xaafada Grønland oo aan deganahay. Waxaan arkay dhalinyaro soomaali ah oo maqaaxida ku shaahayo, kuwaas oo hadalhayo maqaal uu shaley wargeyska aftenposten ka qoray lacagaha aan u dirno wadankii.

Waxaan isku dayay inaan sheekadoodu dhuuxo inta aanan ku sheeko-darsan. cabaar kadib markaan dhageysanayay warkooda ayey ii cadaatay in badankoodu ay ku mashquulsanyihiin hadalka ninka Iiraaniga ah uu ka yiri arintaas, waxeyna ilawsanaayeen arin aniga taas igala muhiimsan oo aheyd shaqo la´aanta dadkeena.

Aad baan u necbahay inaan maqlo hadalka ninkaas soomaalida shaqo ka dhigtay, balse waxaa ii cadaatay inuu arkay kala daadsanaanta iyo isgarabyaaca soomaalida. hadeysan jaajuus soomaali ah la shaqeynin, koleyba waxaan filayaa inuu sifiican uga warqabo xaaladeena. Waligey ma arkin ninkaas oo qowmiyad kale ka hadlayo, xitaa kuwa uu isku dhiibay ee Iiraan.

Hadaad sifiican u akhrisateen maqaalka aftenposten, wuxuu ku saabsanaa in lacagta ugu badan ee aan dirno ay tahay mid nagu soo gashay qaabka ceyrta ah.

Dhibaatadu ma ahan inaan lacag dirto, ee dhibaatadu waa in aanan shaqeysan inteena badan, hadana lacagtii yareyd ee nasoo gashay aan wadankii u dirno.taas ayaa tooshka nagu soo jeedineyso ma ahaane, dhibaato maleh in qofku uu lacag dirsado.

[adsenseyu2]

Aniga waan shaqeeyaa shaqo full fast tid ah, balse waxaan ahey soomaali oo magacaas ayaa la wataa walaalaha aan shaqeysan. Lacagta aan shaqeysto, markii aad canshuurta ka bixiyo kadib aniga ayaa xor u ah oo meeshii rabo u dirsan karo wixii aan rabana ku isticmaali kara.laakiin hadaanan shaqeysan oo aan ceyr qaato, shilinkii isoo gala ninbuu feeraha uga xisaabsanyahay. mana la yaabani inuu igu sheegto xoogaaguu isiiyay.

Run ahaantii dadka ugu badan ee lacagta Norway ka dirsada, waa nimanka Boolaandeeska ah ee guryaha iyo dhismaha ka shaqeeyo. Balse kuwaas cidna uma xisaabsana, maadaama ay lacagtoodu ayaga shaqeysteen, wadankoodana wey kahormarsadeen oo dhismeyaal iyo guryo qurxoon ayey wada leeyihiin.

Hadalkeyga waxaan kusoo dhameynayaa, ceeb ma ahan inaan lacag u dirno wadankii, waana waajib diini ah oo na saaran. Balse waxaan ceeb ah inaanan shaqeysan, xoogaagii caruurta nalagu siiyeyna aan biilal ukala dirno. Aan fadhiga ka kacno oo shaqeysano.

Mahadsanidiin.

W.Q: Cabdirahmaan Jaamac

Hadii aad rabto inaad bulshada soomaaliyeed ee Norway la wadaagto fikirkaaga, aqoontooda, khibradaada ama hamigaaga, waxaad qoraalkaada noogu soo dirtaa: NorSomnews@gmail.com

[adsenseyu2]