Wakaalada wararka ee NTB oo soo xiganeyso wargeys kasoo baxa dalka Bulgaria, ayaa qoreyso in isniintii aan soo dhaafney meydka gabar soomaali ah oo qabow u dhimatay laga helay dhulka buuraleyda xuduudka ah ee u dhaxeeyo wadamada Turkiga iyo Bulgaria.
Waxaana meydka gabadhan soomaaliyeed laga helay tuulada Ravadinovo oo dhacda dhinaca Koonfurta-Bari ee dalkaas Bulgaria. Sida ay sheegeen booliska tuuladaas, waxaa sidoo kale isbitaal kuyaal deegaankas lagu hayaa nin soomaali ah oo isna qabow daran uu haleelay, balse nool oo la helay isaga oo naftu ay kujirto.
Sidoo kale meydka labo nin oo Ciraaq u dhashay ayaa shaley Jimcihii laga helay isla aagaas laga soo qaaday meydka gabadha soomaalida ah. Labadan nin oo da´dooda ay kala aheyd 28 iyo 35 ayaa iyagana u dhintay qabow daran oo dhulkaas buuraleyda kajiro xiligan.
Booliska Bulgaria ayaa sheegay in meydka labadan nin ay soo heleen dadka deegaanka, iyaga oo booliska ku wargaliyay.
Dhulka buuraleyda ah ee laga helay meydka sadexdaan qof, ayaa ah qeybta kaliya ee aan laga ilaalin xuduudka 200 kilometer gaaraya ee u dhaxeeyo wadamada Bulgaria iyo Turkiga. Waxaana sadexdaan qofba ay ahaayeen dad qoxooti ah oo raba iney kasoo gudbaan xuduudkaas, si ay usoo galaan qeybaha kale ee wadamada Yurub.