Wax shaki ah kuma jiro in xiriirka fiican iyo wadashaqeynta ka dhaxeyso guriga iyo iskuulku, ay furo u tahay dhiiragalinta ardeyga ee iskuulka iyo jeclaantiisaba. Si gaar ah waxey taas muhiim ugu tahay caruurta iyo waalidiinta wadanka imaaday mudo aan dheereyn kahor, aqoon fiicana aan u laheyn luuqada iyo dhaqanka norwiijiga.
Gogolxaarista wada-shaqeyn dhex-marta guriga iyo iskuulka, si waalidiinta soo galootiga ah ay saameyn wanaagsan ugu yeeshaan arintaas, waxey faa´iido u tahay mujtaca guud ahaan, iyo waliba dadka soo galootiga ah iyo qoxootiga.
Waxaa jiro waalidiin badan oo ajaaniin ah kuwaas aqoon iyo khibrad fiican leh, hubaashiina haya soo jeedimo dhaxalgal ah, kuwaas oo ilmahooda ku caawin kara iskuulka iyo mujtamaca guud ahaanba. Waalidiintaas waa iney helaan jaanis lagu dhageysyto, waana iney helaan fursad ay banaanka ku keenaan soo jeedimahooda mudan in la dhaqangaliyo.
Waalidiin badan waxey sheegaan in ka qeybqaadashadooda howlaha iskuulada, ay tahay mid aad u yar. Waxaana taas kor istaagan luuqada iyo dhaqanka. Howlwadeenada iskuulada guud ahaan, waa iney fududeyaan caqabadaha ka horistaagan waalidiinta ajaaniibta ah iney la qaataan kulamo iyo wada hadalo iskuulka ku saabsan.
Ardeyda dhigato iskuulada caruurta ilaa laga gaaro dugsiga dhexe, waa kuwo ugu muhiimsan ee laga hadlo, marka lasoo hadalqaado muhiimaa wadashaqeynta guriga iyo iskuulka.
Waxaa haboon in waalidiinta ajaaniibta ah ee heysto ilmo dhigto iskuulada caruurta iyo kuwa hoose-dhexe, ay helaan fursado ay ku kororsan karaan aqoontooda xaga dhaqanka iyo isdhexgalka. Sidoo kale howl-wadeenada ka shaqeeyo iskuuladaas, waa in la siiyo aqoon dheeri ah oo ku saabsan dhaqamada kala duwan ee caruurta iskuulka dhigato iyo wax wada lahaanshaha.
Sidoo kale waxaa haboon in la sameeyo masrax ay waalidiinta ajaaniibta ah ku kulmaan, si ay dhexdooda isku weydaarsadaan aqoonta iyo khibradaha kala duwan. Si markaas waalidiinta ajaaniibta ah ay usii caawiyaan kuwa wadanka ku cusub, kalana taliyaan qaabka úgu fiican ee ilmaha iskuulada loola dhaqmo. Sidoo kale waxa looga baahanyahay si u dhiirigaliyaan, si caruurtooda ay guul ugu gaaraan iskuulka ay dhigtaan.
Wax badan oo wanaagsan ayaa la sameyn karaa, hadii la helo masraxyo aqooneed ay si wadajir ah uga wada shaqeeyaan iskuulada iyo kommunayaasha.
Xigasho/kilde: Asad Qaasim-Blogg
[adsenseyu2]
