Ahmed Hussen ayaa markale loo doortay xildhibaan ka tirsan baarlamaanka Kanada kadib doorashadii guud ee ka dhacday dalkaasi Isniintii, isagoo kusoo baxay kuraasta xaafadda York South–Weston ee magaalada Toronto. Hussen ayaa sidaas ku sii heystay booska uu hayey tan iyo 2015, isagoo hadda ah xildhibaanka keliya ee Soomaali-Kanadiyaan ah ee baarlamaanka ku jira.
Hussen oo ka tirsan xisbiga Liberal-ka ayaa guul ka gaaray musharaxiin kale oo dhowr ah, isagoo ah mid kamid ah saddex Soomaali ah oo sanadkan isu taagay doorashada guud, balse kaliya isagu guuleystay. Labada kale, Sayid Ahmed oo matalayey xisbiga Conservative-ka iyo Omar Abubakar oo u tartamayey xisbiga NDP, ayaa labaduba ku haray doorashadii ka dhacday gobolka Edmonton.
Dib u doorashada Ahmed Hussen ayaa ahayd mid la filayay, maadaama uu yahay siyaasi sumcad sare leh oo xiriir fog la leh bulshada, gaar ahaan Soomaalida. Falanqeeyayaal siyaasadeed ayaa ku tilmaamay guushiisa mid la xiriirta muuqaalka uu bulshada ku leeyahay iyo waxqabadkiisa siyaasadeed, sida uu qoray wargeyska Hiiraan Online.
“Ahmed Hussen waa siyaasi si fiican loogu yaqaan Kanada. Wuxuu soo qabtay xilal wasiiro ah, wuxuuna xiriir xoog leh la leeyahay bulshooyinka soo-galootiga ah, gaar ahaan Soomaalida,” ayuu yiri Abdirahman Abshir Kooreeye, oo ah falanqeeye bulsho.
Dhanka kale, Sayid Ahmed iyo Omar Abubakar oo ahaa musharaxiin cusub, ayaa ka tartamay deegaano aan lahayn Soomaali badan ama dad badan oo muhaajiriin ah, taasoo caqabad weyn ku noqotay. Magac-yaridooda iyo taageero la’aanta bulshada deegaanka ayaa sababtay guul-darro, halka Abubakar uu sidoo kale wajahayo hoos u dhaca guud ee xisbiga NDP.
Ahmed Hussen waxa uu ku dhashay Muqdisho sanadkii 1976, wuxuuna ka qaxay dagaalkii sokeeye ee Soomaaliya sanadkii 1991. Wuxuu markii dambe u guuray Kanada sanadkii 1993, isagoo kasoo gudbay xerada qaxootiga ee Otaango ee dalka Kenya. Hussen wuxuu shahaadada koowaad ee taariikhda ka qaatay Jaamacadda York, wuxuuna shahaadada qaanuunka ka qaatay Jaamacadda Ottawa, isagoo ku takhasusay sharciga socdaalka iyo dambiyada.
Ka hor intii uusan siyaasad gelin, Hussen wuxuu hogaaminayey ururka Canadian Somali Congress, halkaasoo uu ka shaqeynayey xiriirka bulshada Soomaalida iyo booliska, iyo dhismaha isdhexgalka la tashiyeed ee jaaliyadaha kale. Wuxuu sidoo kale aasaasay mashruuca Canadian Somali-Jewish Mentorship Project, oo taageera dhalinyarada Soomaaliyeed iyo fahamka isdhaafsi-dhaqameed.
Tan iyo markii ugu horeysay ee la doortay 2015, Hussen wuxuu noqday xildhibaankii ugu horeeyay ee Soomaali ah ee la doorto baarlamaanka Kanada. Isagoo ka tirsan xukuumadda Ra’iisul Wasaare Justin Trudeau, Hussen wuxuu qabtay xilal kala duwan oo wasiiro ah, sida Wasiirka Socdaalka iyo Qaxootiga, Wasiirka Qoysaska, Caruurta iyo Horumarinta Bulshada, iyo Wasiirka Guryaha, Kala-duwanaanshaha iyo Isdhexgalka.
Sanadkii 2023, Hussen ayaa loo magacaabay Wasiirka Horumarinta Caalamiga ah. Bishii Janaayo 2025, wuxuu hogaamiyey wafdi reer Kanada ah oo booqday xuduudda Suuriya iyo Turkiga kadib markii uu meesha ka baxay xukunkii Bashar al-Assad, halkaasoo uu ku dhawaaqay gargaar bini’aadanimo oo gaaraya 17.25 milyan oo dollar oo loogu talagalay shacabka Suuriya.
Guushiisa afaraad ee doorashada ayaa muujinaysa adkeysiga iyo horumarka siyaasadeed ee jaaliyadda Soomaaliyeed ee Kanada. Si kastaba ha ahaatee, Hussen ayaa weli ah tusaale keli ah oo ka tarjumaya wakiilnimada Soomaalida ee heer federaal, iyadoo Soomaalidu ay yihiin bulsho sii kordheysa oo si weyn uga qeyb qaadata nolosha bulshada iyo siyaasadda dalkaas.
Xigasho/Hiiraan Online.
