Waxaa sii dhawaatay xiliga kama dambeysta ah ee dadka shaqeeya ama kaalmooyinka kala duwan ka qaata dowlada ay dib u celin lahaayeen warbixin sanadeedka canshuurta.
Waa muhiim inaad dib u eegto xisaabaadka ku xusan warqada canshuurta si aad u xaqiijiso in xogta ay sax tahay. Haddii aad la kulanto dhibaato ama aadan si fiican u fahmin, waxaad weydiin kartaa qof aad ku kalsoon tahay inuu kaa caawiyo.
Ha iloobin inaad buuxiso dhammaan fursadaha lagaaga dhimi karo canshuurta (fradrag):
Fradrag waa wax kaa dhimi kara inta canshuur ah ee lagaa qaadayo. Waxaa muhiim ah inaad hubiso haddii aad xaq u leedahay qaar ka mid ah fradragyada caanka ah:
1. canshuur dhimista Safarka (Reisefradrag):
Haddii aad u kala safarto masaafo dheer guriga iyo shaqada, waxaa laga yaabaa inaad xaq u leedahay canshuur dhimis. Waa inaad si gaar ah u buuxisaa warbixinta, qeybta ka hadleyso masaafyadda safarka. Haddii aadan hubin, waxaad isticmaali kartaa kalkuleytarka Skatteetaten – waxaad gelisaa ciwaankaaga iyo kan shaqada, kadibna waxaad heleysaa jawaab.
2. Deeqo la siiyay ururada samafalka:
Ma siisay lacag ururo samafal ah sida Redd Barna ama Leger Uten Grenser sanadkii 2024? Haddii ay jawaabtu tahay haa, waxaa laga yaabaa inaad hesho canshuur-dhimis. Ururka laftiisa ayaa xogtaas u gudbiya Skatteetaten. Haddii aadan ku arkin warbixinta canshuurta, la xiriir ururka si ay xogta u diraan.
3. Wadada dheer ee xarunta xanaanadda:
Haddii aad si joogto ah ugu kaxeeyso caruurta xarunta xanaanadda (barnehage) adigoo shaqo u sii socdo, oo aad maalin walbe goyso safar dheer, waxaad heli kartaa canshuur dhimis,
4. canshuur dhimis kale oo aad xaq u yeelan karto:
Ka hor intaadan gudbin skattemeldingen-kaaga, isticmaal kalkuleytarka canshuur dhimista ee Skatteetaten. Waxaad calaamadeyn kartaa xaaladaha kugu habboon, markaas waxaad ogaaneysaa haddii aad xaq u leedahay canshuur dhimisyo dheeraad ah.
Xusuusnow:
- Ugu dambeyn 30-ka Abriil waa waqtiga kama dambaysta ah ee lagu gudbin karo skattemeldingen.
- Haddii aad horey u dirtay, laakin aad aragtay in aad wax ka hilmaantay, waxaad mar kale dib u buuxin kartaa oo dib u diri kartaa kahor taariikhdaas.
