Ra’iisul Wasaaraha Norway, Jonas Gahr Støre, ayaa la kulmay Madaxweynaha Mareykanka Donald Trump oo ay ku wada kulmeen Aqalka Cad Khamiistii. Wasiirka Maaliyadda Norway, Jens Stoltenberg, ayaa sidoo kale ka mid ahaa wefdiga.
Trump ayaa la hadlay saxaafadda ka hor inta aan kulanka rasmi ahaan bilaaban.
– “Sharaf weyn ayay ii tahay in aan maanta halkan ku soo dhaweeyo Ra’iisul Wasaaraha boqortooyada Norway, oo ah hogaamiye si weyn loo ixtiraamo,” ayuu yiri Trump.
Trump sidoo kale wuxuu ammaanay Jens Stoltenberg, isaga oo xusay shaqadii uu qabtay markii uu ahaa Xoghayaha Guud ee NATO.
– “Waxaad qabatay shaqo weyn, aad iyo aad ayaan kuu mahadcelinayaa,” ayuu Trump ku yiri Stoltenberg.
Trump wuxuu sii raaciyay:
– “Aad ayaan ugu faraxsanahay in aan maanta halkan kugu arko, xilliyaashan muhiimka ah.”
Trump oo amaanay Norway
Trump wuxuu si diirran uga hadlay xiriirka u dhexeeya Mareykanka iyo Norway, isaga oo Norway ku tilmaamay saaxiib dhow.
– “Norway had iyo jeer waxay ahayd saaxiib. Xiriir aad u dhow ayaan lahayn,” ayuu yiri Trump.
Trump wuxuu intaas ku daray inuu jeclaan lahaa inuu la kulmo Boqorka Norway, Boqor Harald.
– “Waxaan jecelahay Norway. Waxaan doonayaa in aan baraf ku ciyaaro. Norway waa wadan qurux badan, dadkooduna waa dad qurux badan,” ayuu hadalkiisa raaciyay.
Ra’iisul Wasaare Støre ayaa Trump u sheegay inuu si diirran ugu soo dhawaynayo Norway, sidoo kalena wuxuu ammaanay dadaalka Trump ee ku aaddan xallinta dagaalka Ukraine.
Mawduucyada laga hadlay
Ra’iisul Wasaare Støre wuxuu watay afar arrimood oo muhiim u ahaa wada hadalka uu la lahaa Trump: iskaashi dhanka difaaca ah, dagaalka Ukraine, canshuuraha Mareykanka ee saameeya Norway, iyo muhiimadda Norway u leedahay Mareykanka.
– “Waxaan isla garanay in dagaalka Ukraine uu u baahan yahay in si degdeg ah loo joojiyo,” ayuu Støre u sheegay warbaahinta NRK kadib kulanka.
Wuxuu sheegay in Mareykanku ay tahay inay cadaadis xooggan saaraan Ruushka.
– “Waa muhiim in waddamada Yurub ay si cad ugu sheegaan Mareykanka inay u baahan yihiin inay kaalin muuqata qaataan,” ayuu yiri Støre.
Khilaafta canshuurta
Trump wuxuu kordhiyay canshuuraha badeecadaha wadamo badan, iyadoo alaabtooda Mareykanka ku noqonaysa mid qaali ah. Canshuurta Mareykanka ee saameysa Norway hadda waa 15%.
Markii la weydiiyay su’aal ku saabsan mustaqbalka canshuuraha, Trump wuxuu sheegay:
– “Norway waxay leedahay sanduuq dhaqaale oo weyn. Ma jiraan wax deyn ah oo ay leeyihiin. Waxaan u maleynayaa inay diyaar u yihiin inay in ka badan bixin karaan,” ayuu yiri Trump.
Støre iyo Stoltenberg waxay muujiyeen in canshuuraha aysan dan u ahayn labada dhinac.
– “Dowladda Norway kama bixiso canshuurahaas. Sidaas darteed, hantideenu si toos ah uguma saameynayso awoodda aan u leenahay bixinta canshuuraha,” ayuu Stoltenberg yiri.
Khabiirada: “Kulan aad u wanaagsan”
Khabiirro badan ayaa la socday sida kulankan uu u saameyn karo xiriirka Norway iyo Mareykanka. Warbaahinta NTB waxay soo xigatay khuburo sheegaya in kulanku uu ahaa guul weyn oo u soo hoyatay Norway iyo Støre.
Eirik Løkke, oo ah khabiir ku takhasusay arrimaha Mareykanka, kana tirsan hay’adda fikirka Civita, wuxuu yiri:
– “Trump wuxuu xoogga saaray xiriirka wanaagsan ee labada dal. Taasi waa muhiim u ah Norway.”
Eirik Bergesen oo ah khabiir arrimaha Mareykanka u qaabilsan TV 2 ayaa isna sheegay:
– “Støre ma sugi karin bilow ka wanaagsan kulankiisa ugu horreeya ee uu la yeesho Trump. Trump wuxuu si joogto ah u ammaanayay Støre, Stoltenberg, iyo shacabka Norway. Intaa waxaa sii dheer, Trump wuxuu sheegay inuu doonayo inuu booqdo Norway oo uu baraf ku ciyaaro.”
Støre oo ku faraxsan fursadda
Kadib kulanka, Støre wuxuu la hadlay warbaahinta isaga oo sheegay in kulanka uu ahaa mid wanaagsan oo dhamaystiran.
– “Aad ayaan ugu faraxsanahay in aan kulankan helay xilli hore oo kamid ah muddada Trump. Waxaan aad u qiimeeyaa xiriir toos ah,” ayuu yiri Støre.
Sida laga soo xigtay wargeyska VG, Norway waxay noqotay dalkii tobnaad ee lagu casuumo Mareykanka tan iyo markii Trump xilka qabtay.
Trump markii la waydiiyay sababta uu Norway sidaa ugu soo dedejiyay, wuxuu ku jawaabay:
– “Sababtoo ah waan jeclahay.”
