Mike Waltz oo ka tirsan Aqalka Wakiilada Mareykanka, isla markaana ah xulashada madaxweynaha la-doortay Donald Trump ee la-taliyaha amniga qaranka, ayaa Arbacadii sheegay in madaxweynaha cusub uu sahminayo siyaabo TikTok ay uga sii jiri karto Mareykanka.
Waltz ayaa hadalkan ku sheegay wareysi uu siiyey weriyaha Fox News Bret Baier, kadib markii Baier uu waydiiyay warbixin lagu daabacay The Washington Post oo sheegtay in Trump uu ka fakarayo inuu soo saaro amar madaxweyne si uu hakad u geliyo dhaqan-gelinta sharci federaal ah oo laga yaabo inuu ka mamnuuco TikTok guud ahaan dalka Axadda soo socota.
Todobaadkii hore, Maxkamadda Sare ayaa dhageysatay doodaha sharci ee dacwad ay gudbiyeen TikTok, shirkadda leh ee ByteDance ee Shiinaha, iyo dadka isticmaala.
Garsoorayaasha ayaa u muuqday kuwo ay u badan tahay inay taageeraan sharcigaas, kaas oo shirkadda ByteDance ku amraya inay iibiso TikTok sababo la xiriira amniga qaranka, haddii kale ay wajihi doonto in laga mamnuuco Mareykanka.
“Haddii Maxkamadda Sare ay soo saarto go’aan taageersan sharciga, Madaxweyne Trump warkiisa wuu cad yahay: Marka hore, TikTok waa bar aad u wanaagsan oo ay isticmaalaan dad badan oo Mareykan ah, waxayna door muhiim ah ka qaadatay ololihiisa iyo faafinta fariintiisa. Marka labaad, wuxuu ilaalin doonaa xogtooda,” ayuu yiri Waltz.
“Waa qof heshiisyo sameyn kara. Ma rabo inaan ka hordhaco amarrada madaxweyne, laakiin waxaan abuuri doonnaa fursad lagu dhammaystiro heshiiskaas,” ayuu hadalkiisa ku daray.
Dhanka kale, Arbacadii, Pam Bondi oo ah Trump u xushtay in ay noqoto xeer ilaaliyaha guud ee qaranka, ayaa ka meer-meertay su’aal la weydiiyay intii lagu guda jiray dhageysi Senate-ka oo ku saabsaneyd inay taageeri doonto mamnuucista TikTok.
Trump ayaa bedelay mowqifkiisa ku aaddan TikTok kadib markii uu isku dayay inuu mamnuuco intii uu xafiiska joogay muddo xileedkiisii hore, sababo la xiriira amniga qaranka.
Intii lagu jiray ololihiisa doorashada 2024, Trump ayaa ku biiray TikTok, kooxdiisana waxay u adeegsadeen si ay ugu xirmaan cod-bixiyeyaasha da’da yar, gaar ahaan ragga dhalinyarada ah, iyagoo faafinayay muuqaallo ujeedkeedu ahaa inay si weyn u faafaan.
Wuxuu ballan qaaday inuu “badbaadin doono TikTok” intii lagu jiray ololaha, wuxuuna u mahadceliyay bartan isagoo sheegay inay ka caawisay kasbashada codadka dhallinyarada.
Xigasho/kilde: VOA-SOMALI
