Tirokoob ay soo saartay hey adda isdhexgalka iyo dib u dajinta qoxootiga ee IMDI, ayaa lagu sheegay in 40% dadka ajaaniibta ah ay ka shaqeeyaan shaqooyin ka hooseeyo heerkooda aqooneed. Halka guud ahaan 14% dadka Norway kunool ee shaqeeya ay ka shaqeeyaan shaqooyin aqoontooda ka hooseeyo.
Inkasta oo ajaaniibta oo dhan ay simanyihiin arrintan, hadana ajaaniibta kasoo jeedo dalalka Latin Amerika iyo Afrika, ayay arrintan si gaar ah u khuseysaa sida lagu sheegay warbixintan.
Sababahan ayaa ajaaniibta hortaagan:
Warbixinta waxaa lagu sheegay in arrimo dhowr ah oo isbiirsaday ay dadka ajaaniibta ah ka hor istaagaan inay helaan shaqooyin u qalmo aqoontooda. Waxaana kamid ah:
- In shahaadooyinka iyo cadeymaha waxbarasho ee dalalkoodii ay kala imaadaan aan loo aqoonsan gudaha Norway.
- In waxyaabaha ay dalalkoodii kusoo barteen aan looga shaqeyn karin gudaha Norway.
- Aqoonta luuqada Norwiijiga oo yar ama aan si fiican qofku uusan ugu hadlin, taas oo qofka shaqo bixiyaha ah ku riixda inay doorbidaan qof kale oo aqoon ahaan ka hooseeya qofka ajnabiga ah, laakiin ku hadla luuqada.
- Cunsuriyo iyo faquuq ka jira suuqyada shaqada Norway, qofkana aan loo tixgalin aqoontiisa shaqsiyeed, balse midabkiisa, jinsiyadiisa iyo magaciisa lagu faquuqo.
Warbixinta ayaa waxaa lagu sheegay:
«Arrintan waxa ay tusineysaa inay jirto fursad weyn oo ku saabsan ka faa´iideysiga aqoonta dadka ajaaniibta ah ee suuqa shaqada, iyo in hoos loo dhigo waxyaabaha ajaaniibta ka xaniba inay suuqa shaqada aqoontooda ku adeegsadaan»
Xigasho/halkan ka akhri warbixinta: Etnisk mangfold og inkludering i arbeidslivet
