Sida uu xafiiska shaqada iyo taakuleynta dadweynaha ee NAV ku cadeeyay war qoraal ah, NAV ayaa dad gaarayo 20.000 qof si qaldan ugu xisaabisay lacagta Dagpenger ee la siiyo qofka shaqada ka dhamaatay ama shaqo raadiska ah.
Qaladkan oo dhacay mudadii u dhaxeysay january sanadkii 2019 ilaa desember 2021 ayaa ka dhigan in dad gaarayo 20.000 qof ay heleen lacag aan u dhigmin mida ay xaqa u lahaayeen, taas oo ka dhashay qaabka ay NAV u xisaabisay cadadka lacageed ee qofku uu xaqa u leeyahay.
Waxa ayna NAV sheegtay inay ogtahay dadka uu qaladkan saameynta ku yeeshay, ayna dhawaan lasoo xiriiri doontaa. Waxaana dhici karto in dadka qaarkood dib loogu soo celiyo lacago ay xaq u lahaayeen oo aysan helin.
