Afartii sanaba mar ayay dhacaan doorashooyinka goleyaasha deegaanka dalkan Norway, waxa aana dooranaa shaqsiyaadka nagu matala fagaarayaasha siyaasadeed ee heer deegaan iyo mid gobol.
Doorashada golaha deegaanku waa mid aad u muhiim ah, oo dadka oo dhan lagu boorinayo inay ka qeybqaataan, maadaama Golaha deegaanku uu yahay meesha lagu go aamiyo arrimo badan oo aasaasi iyo muhiim u ah nolosheena maalinlaha ah, sida tusaale ahaan koritaanka caruurteena iyo nolosha guud ee deegaanka iyo bulshada aan la noolnaheyba.
Waxaa halkaas lagu go aamiyaa siyaasadda la xiriirta caafimaadka iyo daryeelka bulshada sida isbitaaladda, goobaha dadka waayeelka lagu xanaaneeyo, xanaannada ubadka ee tusaale hey adda barnevenrka,, iskuuladda, dayactirka jidadka baabuurka iyo wadooyinka la maro, adeega gaadiidka dadweyne ee aan raacno, waxbarashada hoose dhexe iyo mida sare, goobaha lagu caweeyo, kuwa loo nasasho dago iyo waxyaabo oo kale badan.
Qoraalkan kooban waxa aan idinkugu soo gudbin doonaa macluumaad la xiriira doorasha goleyaasha deegaanka:
Maalinta doorashadu ee rasmiga ah waa Isniin 11. sebtembar 2023. Balse degmooyin badan ayaa sidoo kale laga codeyn karaa maalinta axadda ah ee 10-ka bisha September. Linkiga hoose ayaad ka heli kartaa liiska degmooyinka aad codkaada labadda maalmood, hadii aad qabto su aal arrintaas ku saabsana waxa aad la xiriiri kartaa dowlada hoose ee degmadda aad rabto inaad codkaada ka dhiibato.
Hadaba goormee ayaad codkaaga dhiiban kartaa:
Goobaha codbixinadda waxaa la furi doonaa 10-ka bisha August. Waxaadna awoodaa inaad degmo walba oo Norway ah ka codeyso, laga bilaabo tobanka(10) bisha August ee sanadkan 2023 ilaa laga gaaro Sideeda(8) bisha September.
Maalinta doorashada ee 11-ka September, waxa aad ka codeyn kartaa oo keli ah degmadda aad degantahay ama aad ka diiwaangashantahay inaad degeneyd ugu danbeyn sodonkii(30) Juun ee sanadka 2023.
Hadii aadan codkaada dhiiban karin ama aad dalka ka maqantahay maalinta doorashada iyo maalmaha ka horeeyo ee ay furanyihiin goobaha codbixinta, waxa aad awoodaa inaad codkaada si hordhac ah usii dhiibato laga bilaabo sadexda(3) bisha Luulyo ilaa laga gaaro sagaalka(9) bisha August.
Hadii aad rabto inaad codkaada si hordhac ah usii dhiibato, kahor inta aan la gaarin tobanka august, waxaad la xiriiri kartaa degmadda aad rabto inaad ka codeyso. Degmooyinka qaarkood waxa ay bixiyaan fursad codbixin xiliyada caadiga ah ee degmadu ay shaqeyso, halka kuwa qaarkood ay shardi kaaga dhigayaan inaad balan kasii qabsato.
Hadii aad ku sugantahay dalka dibadiisa, waxa aad heysataa fursad ah inaad codkaada ka dhiibato safaaraddaha iyo qunsuliyaddaha Norway ee dalalka dibadda ah. Waxa aad adiga oo ku sugan dalalka dibadda ah codkaada dhiiban kartaa mudadda u dhaxeyso sadex(3) Luulyo ilaa kowda(1) Bisha September.
Hadii aad tusaale ahaan ku sugantahay dalka Kenya, waxa aad ka codeyn kartaa safaaradda Norway ee Nairobi ama qunsuliyadda Mombassa. Hadii aad ku sugantahay Ethiopia waxa aad ka codeyn kartaa safaaradda Norway ee adiss abbaba. Linkiga hoose ka fiiri meesha ee kuugu dhow ee aad ka codeyn karto, hadii aad ku sugantahay dalka dibadiisa. Xusuusnow waxa muhiim ah inaad xaq u leedahay ka codeynta doorashada goleyaasha deegaanka Norway.
Safaaraduhu iyo qunsuliyadu waxa ay leeyihiin xiliyo iyo maalmo gaar ah oo laga codeeyo, hadii aad rabto inaad codkaaga ka dhiibato safaarad ama qunsuliyad dibadda ah, la xiriir goobtaas ama booqo bogagooda internetka.
Waxaa muhiim ah in marka aad codkaada dhiibaneyso, ama aad ku socoto goob codbixin aad soo qaadato aqoonsi leh sawirkaaga iyo magacaaga, kaas muujinayo qofka aad tahay. Waxa uu tusaale ahaan aqoonsiga noqon kara baasaboor, kaarka aqoonsiga qaranka ee Nasjonjalt ID-ka, leysinka baabuurka ama kaar banki oo leh sawirkaaga iyo magacaagada oo sadexan.
Hadaba yaa codeyn karo ama ka qeybqaadan karo doorashada goleyaasha deegaanka Norway:
- Waxaa codeyn kara Muwaadin walbe oo Norwiiji ah jira 18 sano ama da’ da 18 sano gaari doono inta lagu gudo jiro sanadka 2023, kaas oo kunool Norway, ama ka diiwaangashan oo adress ku ah Norway.
- Waxaa sidoo kale codkooda ka dhiiban karo doorashada goleyaasha deegaanka Norwau, Muwaadiniinta u dhashay dalalka Denmark, Finland, Iceland, Sverige ee buuxiyay da\ da 18-ka sano , kuwaas oo ka diiwaangashan inay ku noolyihiin Norway ugu danbeyn 30-ka bisha Juun ee sanadkan 2023.
- Sidoo kalenw waxa codkooda ka dhiiban karo doorashada, dadka aan heysan dhalashada Norway ee buuxiyay 18-ka sano ama sanadkan buuxin doono 18 sano, ee sadexdii sano ee ka horeeyay maalinta doorashada ku noolaa dalkan Norway sifo sharci ah.
Kaarka ama warqada doorashadu:
In badan oo naga mid ah waxa ay helnay ama dhawaan heli doonaa kaarka doorashada.
Kaarka doorashada waxa uu cadeynayaa inaad xaq u leedahay ka qeybqaadashada doorashada aadna codkaada dhiiban karto. Waxa kaarka aqoonsiga ku qoran macuumaadka la xiriira seejadda codbixin ee codkaaga ka dhiiban karto, iyo xiliga aad codeyn karto.
Waa muhiim inaad xusuusnaato in kaarka doorashadu uusan aheyn aqoonsi, uma baahnid inaad soo qaadato kaarka doorashada si aad codkaada u dhiibato.
Kaarka doorashada waxa qaab digital ahaan ah loogu soo diri doonaa sanduuqa boostada ee digitalka ah ee altinn-kaaga. Hadii iska xayirtay helitaanka boosooyinka dowliga ah ee digitalka ah, ama aadan adeegsan adeega aqoonsiga digitalka ah 18-kii bilood ee ugu danbeeyay, waxa aad heli doontaa kaar doorashada oo waraaqad ah.
Hadii aadan helin kaarka doorashada, ama aad shaki ka qabto inaad xaq u leedahay ka qeybqaadashada doorashada, waxa aad la xiriiri kartaa degmadda aad degantahay ..
Waxa aad sidoo kale la xiriiri kartaa mid kamid ah shaqaalaha doorashada, hadii aad su aal qabto ama aad u baahantahay in lagaa caawiyo sidii aad codkaada u dhiiban laheyd. Shaqaalaha doorashada waxaa saaran waajibka sir-qarinta, macluumaadkaagana lama wadaagi karaan qof kale.
Hadii ay jirto caqabad naafo ahaaneed oo jirka ama maskaxda ah, oo kaa horistaageyso inaad codkaaga si iskaa ah u dhiibato, isla markaana aad u baahantahay in lagaa caawiyo sidii aad codkaaga u dhiiban laheyd, waxa aad sidoo kale la xiriiri kartaa shaqaalaha doorashada. Waxaad xaq u leedahay in lagaa caawiyo sidii aad codkaaga u dhiiban laheyd, adiga oo adeegsanayo shaqaalaha doorashada ama qof kale oo aad adigu dooratay.
Qoraalka danbe waxa aan ku sharixi doonaa qaabka aad u codeyn karto, ama aad codkaaga u dhiiban karto, marka aad tagto goobaha codbixinta.
