Laga bilaabo maanta oo ay tahay kowda bisha Janaury ee sanadka 2023, waxaa dhaqangalay isbadal lagu sameeyay qodobo kamid ah sharciga shaqada iyo shaqaalaha Norway ee loo yaqaan Arbeidsmiljøloven.
Waxyaabaha isbadalka lagu sameeyay ayaa waxaa kamid ah in shirkaduhu aysan si fudud shaqada uga ceyrin karin shaqaalaha u shaqeeyo. Waxaana sharcigan cusub uu waajib uga dhigayaa shirkaddaha in hadii shirkadu go’ aansato inay shaqada ka ceyriso qof shaqaale ah, ay marka hore raadiso shaqo ama howl kale oo uu qofku ka qaban karo isla shirkadda, ama qeybaha kale ee shirkaddaas, kahor inta aan loo bandhigin shaqo ka ceyrinta.
Isbadalkan cusub ee sharciga shaqada iyo shaqaalaha ayaa sida ay dowladu sheegtay adkeynayo xuquuqda qofka shaqaalaha ah, kana hortagayo in shirkaduhu ay qof shaqaalaha shaqada si fudud uga ceyriyaan, iyaga oo aan marka hore sameyn dadaal xoogan oo qofkaas isla shirkadda gudaheeda shaqo kale looga raadinayo.
