Dalalka Yurub waxaa walaac aad u xoogan laga qabaa sarre u kac xad ka bax ah oo ku imaada sicirka korontada iyo gaaska korontada laga dhaliyo, kadib markii dalka dowlada Ruushku ay yareysay, meelaha qaarkoodna ay gabi ahaanba joojisay shidaalkii ay u dhoofin jireen dalalka Yurub.
Sarre kaca sirirka shidaalka ayaa saameyn xoogan oo muuqato, aadna loo dareemayo ku yeeshay nolol maalmeedka dadka kunool Yurub, dalalku haba sii kala darnaadeen ah. Dalka Germany oo ah matoorka dhaqaalahaha dalalka Yurub ayaa dowladiisu ku dhawaaqday xaalad deg-deg ah oo ku saabsan sidii looga gaashaaman lahaa koronto la aan soo wajahdo dadka kunool dalkaas.
Maadaama hada lagu jiro xiliga kuleylaha oo qoraxi jirto, walaaca ugu xoogan ayaa ah sida ay xaaladu noqon doonto marka la gaaro bilaha qaboobaha ama winterka hadii ay xaaladu sidaan kusii socoto.
R.W Norway: Xili adag ayaa nagu soo socda.
Reysulwasaaraha Norway, Jonas Garh Større ayaa maanta sheegay in Norway si lamid ah dalalka kale ee Yurub ay kusoo wajahantahay xili adag oo u baahan u tabaabusheysi fiican iyo diyaar garow xoogan. Wuxuuna reysulwasaaraha carabka ku adkeeyay in walaaca ugu weyn ee dowladu uu yahay qaaliyowga sicirka korontada iyo saameynta uu ku yeelan doono nolosha dadka.
Sanadkan 2022 qiimaha ama sicirka korontada Norway ayaa gaaray heerkii ugu sareeyay abid, waxeyna dowladu soo rogtay sharciyo cusub oo dadka looga qafiifinayo sicirka korontada. Iyada oo dowladu ay kaalmooyin dhaqaale iyo xirmooyin taakuleyn ah u fidisay dadweynaha, si ay u awoodaan bixinta korontada. Taas oo jirtana waxaa wali aad looga cabanayaa in korontada Norway ay tahay mid aad qaali ugu ah dadka danyarta ah, ama qoysaska heysta ilmaha tirada badan.
Reysulwasaaraha ayaa maanta mar kale sheegay in dowladu ay ku fakareyso in talaabooyin cusub la qaado, si loola tacaalo sicirka korontada qaaliyowday. Reysulwasaaraha ayaa sheegay in dowladu ay hada qiimeyneyso in sicir go’an loo gooyo qiimaha korontada ay dadku bixiyaan. Arrintaas oo ku imaan karto labo siyaabood midkood:
- In qofku uu qiimo go’ an oo cayiman uu bixiyo bishii, dowladuna ay kabto inta kale.
- Ama in shirkadaha korontadu ay ugu badnaan qofka ku dalici karaan qiimo la isla ogyahay oo go’an, dowladuna ay damaanad qaadeyso bixinta qarashaadka dheeriga ah ee isticmaalka korontada dadweynaha.
Reysulwasaaraha ayaa sheegay in arrinta meesha taalo ay tahay in hadii ay dowladu sicir go’ an u goyso korontada, aysan dadweynuhu ka fakiri doonin yareynta iyo dhowrista adeegsiga korontada. Arrintaas ay dhaawac gaarsiin karto suuqa iibsiga korantada iyo qiimaha dowlada uga baxayo. Sidaas labadda qaab ee korontada sicir go’ an loogu sameynayaba ay dhibaatooyin wataan.
Jonas Garh Større ayaa sidoo kale sheegay in dowladu ay ka fakareyso in korontada laga kabo ganacstada iyo goobaha ganacsiga, si qaaliyowga korontadu uusan u saameyn dhaq-dhaqaaqa suuqyada ganacsiga.
