21-da bisha soo socoto ee September, waxaa maxkamadda magaalada Sandnes ee gobolka Rogaland lasoo taagi doonaa nin 62 sano jir ah, kaas oo ku eedeysan fal khiyaano iyo wax isbada-marin dhaqaale ah.
Ninkan ayaa sida ku xusan gal-dacwadeedka xeer ilaalinta, wuxuu mudo labo(2) sano ah oo u dhaxeysay September sanadkii 2016 ilaa September 2018 NAV u xareyn jiray kaarka loo yaqaan «Meldekort» ka ee ay soo gudbiyaan dadka kaalmooyinka dhaqaale ka hela NAV.
Ninkan ayaa NAV ka codsan jiray in lagu kabo taageero dhaqaale, maadaama uu dakhliga dhaqaale ee soo gali jiray uu hoos u dhacay, sababo la xiriira inuusan shaqeyn karin, kadib markii awoodiisa caafimaad ee shaqo ay yaraatay. Wuxuuna NAV ka qaadan jiray lacagaha dadka xanuunsan ee shaqada ka fariistay ee Sykepenger iyo AAP.
62-sano jirkan ayaa mudadaas labadda sano ah NAV ka helay lacag gaareyso 757.828 kr oo markii danbe la ogaaday inuusan xaq u laheyn.Waxaa gadaal laga ogaaday in ninkan uu si caadi ah u shaqeyn jiray, uuna ka shaqeyn jiray suuqa dhismaha.
Sida ku xusan gal-dacwadeedka xeer ilaalinta, waxaana eeda ah in NAV uu lacag ka qiyaanay ka sokow loo heystaa inuusan bixin canshuurtii ku waajibtay ee dakhliga kasoo gali jiray shaqadiisa. Waxaana hada lagu eedeynayaa inuusan bixin canshuur ku dhow 100.000 kr.
