Shirkada iska leh goobaha lagu jimicsado( Trening gareeyo) ee EVO ayaa qiratay inay lacag dheeraad ah ka goosan jirtay koontooyinka dadka xubnaha ka ah ama ka trening gareeyo xarumaha jimicsigeeda.
Ilaa hada 1000 qof ayaa soo diiwaangaliyay in lacag dheeri ah ay EVO ka goosatay koontooyinkooda. Balse waxaa la fili karaa in tirada rasmiga ah ay intaas ka badantahay. Dadka ayaa waxaa koontooyinkooda ka go’ayay lacag afar jibaar ka badan lacagta xubinimadda.
Arrintan ayaa la ogaaday kadib markii dadka macaamiil ka ah xarumaha shirkadan ay baraha bulshada kusoo bandhigeen in EVO ay ka goosatay lacag ka badan tan fiiga( qarashka) xubinadda goobta jimicsiga. Arrintaas oo keentay in dad badan ay si caro leh uga hadlaan, soona bandhigeen dareenkooda ku aadan in la qimaayay.
Macaamiisha qaarkood ayaa sheegay in maadaama ay EVO ka goosatay lacag dheeri ah, ay awoodii waayeen inay gataan waxyaabaha aas-aasiga ah ee nolosha ama guryahooda usoo adeegtaan.
EVO ayaa markiiba qiratay Qaladka, balse waxey arrintaas ku sameysay cilad farsamo oo ka imaaneyso shirkadda ay EVO ka kireysatay agabka lacag-bixinta. Waxeyna EVO sheegtay in dhamaan macaamiishii sida qaladka ah looga goostay lacagaha dheeriga ay heli doonaan lacagtoodii, arrintaas oo khuseyso macaamiisha soo diiwaangaliyay inay lacag ka maqantahay iyo waliba kuwo aan wali soo diiwaangalinba.
