Taksiile ka shaqeeyo degmooyinka Bærum iyo Ringerike, ayaa lagu xukumay 7 bilood oo xabsi ah. Kadib markii lagu helay danbi ah in uu xad-gudub jinsiyeed (Damaaci galmo) u geystay gabar rakaab ah oo taksigiisa saarneyd. Xukunka xabsiga ah waxaa u dheer in lagu xukumay in lacag magdhow ah oo gaareyso 150.000 kr uu siiyo gabadha dhibanaha ah oo da ahaan jirtay 17 sano xiliga uu falkaas dhacay.
Maxkamadda ayaa sidoo kale ninkan oo da’ ahaan jiro kontomeeyo sano(50) ka mamnuucday in inta noloshiisa ka dhiman uusan wadi karin gaadiidka dadweynaha ee Taxi-ga.
Taksiilaha la xukumay ayaa iska fogeeyay danbiga lagu eedeeyay, wuxuuna maxkamadda ka hor sheegay inuusan galin danbiga lagu eedeynayo. Balse maxkamadda ayaan rumeysan sharaxaada ninkan, maadaama lagu eedeeyay in dhowr mar oo kala duwan uu siyaabo kala duwan u sharaxay qaabkii ay wax u dhaceen.
Sharaxaada eedeysanaha waxaa sidoo kale dhaawacay kadib markii haweeney kale oo marag-fur ka sameysay maxkamadda ay sheegtay in xad-gudub noocaas oo kale ah uu horey ugu geystay isla taksiilahan.
