Baarlamaanka Norway ayaa maanta oo Talaado ah meelmariyay in la kala gooyo gobolka weyn ee Viken, dibna loogu celiyo sadexdii gobol ee horey uu uga koobnaan jiray ee Akershus, Buskerud iyo Østfold.
Baarlamaanka ayaa sidoo kale go´aamiyay in gobolada Vestfold iyo Telemark uu mid walba dib ugu noqdo gobolnimadiisa, lagana noqdo go´aankii labadaas gobol horey loogu mideeyay. Gobolada Finnmark iyo Troms oo horey hal gobol lagu mideeyay ayaa iyagana mid walba dib ugu noqon doono gobol gaar ah.
Ansixinta baarlamaanka ee dib u kala goynta gobolada la mideeyay ayaa waafaqsan soo jeedin ay horey usoo jeedisay xukuumadda. Waxeyna dhaqan galinta gobolada cusub ka bilaaban doonaan kowda(1) bisha koowaad(1) ee sanadka 2024.
Norway ayaa wixii ka danbeeyo 1.1.2024 ka koobnaan doonto 15 gobol, halka ay hada ka kooban tahay 11 gobol.
