Turkiga ayaa shaley ogolaaday in ururka Nato uu aqbalo ka shaqeynta codsiga kamid noqoshada ururka Nato ee dalalka Finland iyo Sweden. Ogolaanshaha Turkiga ayaa kasoo horjeedo go’ aankii uu madaxweynaha dalka Turkiga horey ugu diiday in Finland iyo Nato ay kamid noqdaan ururka Nato.
Su aal ay dad badan is weydiinayaan ayaa aheyd maxaa sababay isbadalka ku yimid go’aanka dowlada Turkiga. Jawaabta ayaana noqoneyso in madaxweynaha dalka Turkiga uu dhamaan waxyaabihii uu dalbaday uu ka helay madaxda dalalka Finland iyo Sweden, uuna ka saxiixay heshiis is-afgarasho ah.
Waxyaabaha uu Turkiga dalalkaas ka codsaday ee la ogolaaday ayaa waxaa kamid ah:
- In Sweden iyo Finland aysan taageerin ama wax caawin ah oo macnawiyan ah ama gacan ah aysan siin karin ururadda la dagaalama dowlada Turkiga, gaar ahaan ururadda kurdiga ee PKK iyo YPG. Dowlada Turkiga ayaa ururadaas u aqoonsan argagaxiso, halka Sweden iyo Finland ay argagaxiso ugu jirin liiskooda. Saas oo ay taheyna labadaas ururba hada waxey noqon doonaan kuwa aan laga rabin Sweden iyo Finland. Waxeyna hadda gali doonaan liiska ururadda argagaxisda ee EU-da.
- Intaas kuma ekaan e, Erdogan ayaa labadda dowladoodba ka saxiixay inay la dagaalamaan dhamaan dhaq-dhaqaaqyadda siyaasi ama milatari ee ururadaas iyo xubnahooda ay ka sameeyaan gudaha Finland iyo Sweden. Qodobkan ayaa lagu micneeyay in howlaha ururuadaas dhamaantooda laga mamnuuci doono labadda dalba.
- Labadda dalba waxey balan-qaadeen inay Turkiga usoo gacan-galin doonaan dadka Turkiga uga eedeysan argagaxisada ee dowladu Turkiga ay dalbadu in loo soo gacan-geliyo. Turkiga ayaa mar horeba diray liis ay ku qoranyihiin 33 xubnood oo Kurdi ah, kuwaas oo Turkiga uga eedeysan argagaxiso.
- Sweden ayaa qaadi doonto xayiraadii dhoofinta hubka ee horey ay Sweden u saartay Turkiga.
Ogolaanshaha Finland iyo Sweden ee dhamaan afartan qodob ayaa ka dhigan in Erdogan iyo Turkiga loo yeelay dhamaan wixii ay codsadeen. Taa badalkeedana uu Turkigu ogolaaday in la aqbalo ka shaqeynta codsiga Finland iyo Sweden.
