Ilaa inta la xaqiijiyay waxaa geeriyooday labo(2) qof, kadib markii nin hubeysan uu toogasho ka geystay baar caan ah oo kuyaal bartammaha magaalada Oslo. Waxaa ay boolisku xaqiijiyeen in ilaa 14 qof oo dhaawacyo kala duwan qabo loo qaaday isbitaaladda.
Sadex kamid ah dhaawacyadda ayaa la sheegay in xaaladoodu ay tahay mid halis ah. Waxaana jiro dad badan oo goob-joog ka ahaa goobta uu falka ka dhacay, kuwaas oo la sheegay inay qabi karaan dhaawacyo dhanka maskaxda ah.
Booliska ayaa dhanka kale sheegay inay gacanta ku dhigeen nin lala xiriirinayo inuu yahay qofka falka toogashada ka geystay baarka London Pub oo ah baar ay ku kulmaan dadka jinsi ahaan isku hawoodo ee loo yaqaan gay-ga. Booliska ayaa sheegay in ilaa hada falka dhacay lala xiriirinayo ninkaas, ayna ka shaqeynayaan xaqiijinta inay jiraan dad kale oo falkan ku weheliyay ninka la tuhunsanyahay oo xiligan ay boolisku xabsiga dhigeen.
Toogashada caawa ka dhacay Oslo, laguna beegsaday baarka ay ku kulmaan dadka gay-ga, ayaa kusoo aadeyso xili magaalada Oslo iyo guud ahaan Norway isbuucan ay ka jirtay dabaaldegyadda ay abaabulaan kooxaha u ololeeya xuquuqda dadka gay-ga ah.
Wixii arrintan kusoo kordha dib ayaan kasoo galin doonaa.
