Shirkada diyaaradaha Ethiopian Airlines ayaa bishii hore ay sheegtay inay duulimaad ku tagi doonto labo magaalo oo cusub oo Soomaaliya katirsan, kuwaas oo kala ah Goroowe iyo Boosaaso. Waxeyna horey duulimaadyo ugu tagi jireen magaalooyinka Muqdisho iyo Hargeysa.
Shirkada ayaa war arintaas ku saabsan u dirtay warbaahinta ka hadla arrimaha duulimaadka diyaaradaha iyo safarka.
Webseedyo ay maamulaan kooxaha xagjirka ah, ayaa maalmahan aad uga hadlayay arintaas, waxeyna sheegeen in soomaalidu ay hada heli karaan fursado kale oo dheeri ah oo dalkoodii ay dib ugu noqon karaan, ugana guuri karaan Norway. Waxeyna sii raaciyeen maqaalo bahdil, faquuq iyo aflagaado loogu geysanayo soomaalida.
Warbaahinta kooxaha xagjirka midigta fog ah ayaa sheegay inay warkaas kasoo xigteen wakaalada wararka ee NTB, taas oo ah wakaalada ugu weyn dhanka wararka Norway oo dhan.
NTB ayaa maanta beenisay in warkaas laga soo xigtay, waxaana warbixin arintaas ku saabsan qoray Faktisk.no oo ah warbaahin dabagal ku sameysa wararka ay warbaahinta kale qorto.