Laga bilaabo 14-ka bishan soo socoto ee May, dadka kujira xeryaha qoxootiga ee wadankan Norway ayaa loo ogolaan doonaa waraaqda shaqada ee loo yaqaan «arbeidstillatelse». Waxaana sidaas shirweynaha xisbiga qaran ee Venstre ka sheegtay, Trine Skei Grande oo ah gudoomiyaha xisbigaas.

Sida ku xusan warka kasoo baxay dowlada, ogolaanshaha waraaqda shaqada ayaa la siin doonaa dadka kujira xeryaha qoxootiga ee loo yaqaan Integreringsmottak, xeryahaas oo ah kuwa la geeyo dadka heysta sharciga magangalyada, ama ay u badantahay inay magangalyo heli doonaan.

Gudoomiyaha xisbiga Venstre Trine Skei Grande ayaa ku faantay in xisbigeedu uu ahaa kan ka danbeeyo meel-marinta qodobkan oo a sheegtay inuu muhiim u yahay xisbiga Venstre.

Wasaarada cadaalada ayaa lagu wadaa inay soo saarto faah-faahin dheeri ah oo arintan ku saabsan.

Xigasho/kilde: DN.NO