Ola Borten Moe oo ah gudoomiye ku xigeenka xisbiga Senterpartiet, ayaa sheegay in xisbigiisu uu soo jeedinayo in lacagta taageerada ah ee la siiyo goobaha cibaadada, lagu qiimeeyo xubnaha medlemka ka ah goobtaas cibaadada, ee heysta dhalashada wadankan Norway(Norsk-statsborgere). Isla markaana la joojiyo lacagta lagu taageero goobaha cibaadada dadka aan wadanka dhalashadiisa heysan.
Ole ayaa sheegay in qof walba oo Norway ku sugan uu cibaadadiisa diineed u fushan karo si caadi ah, balse aysan qasab aheyn in dadka kale shaqo looga dhigo iney cibaadadiisa lacag ku bixiyaan.
Waxey ka dhigantahay soo jeedinta Sp in hadii goob cibaado, tusaale ahaan masaajid ay xubno(medlem) ka yihiin 1000 qof, oo ay 150 kamid ah dhalashada wadanka heystaan, in masaajidkaas la siiyo taageero dhaqaale oo ku jaan go´an 150-kaas qof ee wadanka dhalashadiisa heysta. 850-ka kalena aan la xisaabin.
Sida ay qorayaan qaar kamid ah warbaahinta, waxaa dhici karta in xisbiga Sp, barnaamijkiisa doorashada ay kusoo darsadaan qodobkan, marka ay yeeshaan shirweynahooda guud ee sanadkan 2017.
Sp ayaa sidoo kale soo jeediyay qodob kale oo muran badan dhaliyay, kaas oo ah in saami-qeybsiga kuraasta baarlamaanka Norway, lagu qeybiyo tirada dadka dhalashada wadanka heysto ee gobalada Norway dagan, inta tirada ee dadka deegaanka kunool la isku xisaabin lahaa.
Waxeyna ku andacoonayaan in dadka dhalashada wadanka heysto ay yihiin, kuwa kaliga ee codka bixin kara xiliyada doorashada madaxtinimada.
SV: waan kasoo horjeednaa.
Xisbiga SV ayaa sheegay in labadaas qodob oo ay soo jeediyeen Sp ay ay kasoo horjeedaan. Waxeyna sheegeen in shaqada xubnaha baarlamaanka ay tahay iney metelaan dadka deegaanka kunool oo dhan. Kuwaas oo ka kooban kuwo codka dhiiban kara iyo kuwii aan codadkooda xilayada doorashada dhiiban karin. Waxaana kamid ah caruurta aan qaangaarin ee aan dhiiban karin codka, dadka aan loo ogoleyn iney cod dhiibtaan, dadka dhalashada wadanka heysta iyo waliba kuwa aan heysan.
Kari Elisabeth Kaski oo ah xogyaha xisbigaas SV ayaa sheegtay in ujeedada laga leeyahay taageerada goobaha cibaadadu ay tahay in si isku mid ah loo taageero meelaha ay dadku ku cibaadeystaan. Soo jeedinta Sp ay god ku rideyso dhex-siyaasada dhexaadnimada dowlada ee la xiriirta waxa ay dadku rumeysanyihiin. Waxeyna sii raacisay qofkii degan Norway, aktivna ka ah goob cibaado, ay wax lala yaabo ay tahay inaan la taageerin.
Xisbiga kale ee KRF ayaa si iyagana si uyara diidan soo jeedintaas. Olaug Bollestad oo katirsan xisbiga KRF ayaa sheegay in soo jeedinta Sp ay la micno tahay in qofkii aan cod dhiiban karin, uusan u baahneyn qof ku matalo baarlamaanka, baahiyadoodana gudbiyo.
Xigasho/kilde: VG
[adsenseyu2]
