Ninkan wajigiisa horey ma u aragtay? 20 sano kahor, April 1996 xagee joogtey?. Horey ma u maqashey wax la dhaho Innvandreregnskap.? Mise ogtahay in ninkan go-aan uu gaarey 1996, ay maanta kuu fududeyneyso inaad Norway ama Oslo degenaato dhibaato la´aan? 

Khaled Mohamud waa siyaasi ka tirsan xisbiga shaqaalaha ee Ap, waxa uu kamid yahay golaha deegaanka ee Oslo. Asalkiisu waa Pakistani, balse wuxuu Norway yimid isaga oo 16 jir ah. Waana siyaasiyiga xiliga ugu dheer fadhiyay golaha deegaanka ee Oslo, isaga oo kamid noqday sanadkii 1983, ilaa hadana wuu fadhiyaa. 1983 waa sanadkii la ogolaadey in qof heysto dhalasho ajnabi ah uu kamid noqdo golaha deegaanka magaalooyinka. 

innvandrerregnskap iyo 1996?

Khaled hada waxa uu ka tirsanyahay xisbiga Ap, balse waxa uu Labaatan sano ku dhawaad kamid ahaa xisbiga Høyre, ilaa uu isaga baxey sanadkii 1996. Sababta uu khaled uga baxey xisbiga Høyre ayaa aheyd, diidmadii uu diidey wixii lagu magacaabi jirey innvandrerrenskap.

Xisbyada Høyre iyo Frp oo isgarabsanaya ayaa soo jeediyay qorshe ay ugu magac-dareen innvandrerregnskap, taas oo loola jeeday in la xisaabiyo dakhliga soo gala shaqsiyaadka ajaaniibta ah ee Oslo kunool.  Inkasta oo qorshahooda ay aad u qurxinayeen, hadana ujeedada guud ee ka danbeysa, waxey aheyd in la xisaabiyo dhaqaalaha soo gala shaqsiyaadka ajaaniibta ah.

[adsenseyu2]

Sidaasna lagu qiimeeyo iney wadanka faa iido u leeyihiin iyo iney nusqaan dhaqaale ku hayaan. Hadhowna la dhaho qowmiyad hebel ayaa wanaagsan ee hala soo dhaweeyp ama qowmiyad heblaayo  faa iido malahan, ee yaan la qaabilin. 

FRP iyo Høyre waxey heysteen kalsooni iyo kuraas ku filan oo ay ku meelmariyaan qorshahooda, balse waxaa ka hoos kacey Khaled oo diidey inuu taageero qorshaha xisbiga uu kamid ahaa ee Høyre. Cadaadis xoogan ayaa lagu saarey inuu taageero qorshaha, balse wuu diidey, ugu danbeyna wuxuu go-aansadey inuu xisbiga Høyre isaga baxo gabi ahaanba. Waxa uuna golaha deegaanka Oslo kasii mid ahaadey isaga oo aan xisbina matalin, ee shaqsi madaxbanaan ahaan kujoogo. Gadaal danbana wuxuu ku biirey xisbiga shaqaalaha ee AP, oo uu ilaa maanta ka tirsanyahay

Khaled waxey mediayaha wadanka ay ka qoreen oraah uu ku caan baxey oo aheyd:

Alaabta suuqa taalo ayaa la qiimeeyaa, ee qof bini aadam ah qiimahiisa lacag laguma xisaabiyo.

Bixitaanka iyo iscasilaada Khaled Mahmood waxey sababeen in FRP iyo Høyre ay waayaan kuraas ku filan, si ay talada degmada Oslo ula wareegaan. Halkaasna waxaa ku burburey qorshii qiimeynta dhaqaalaha ajaaniibta. Khaledna waxa uu sidaas ku noqday halyeey, ilaa waagaasna, kursigiisa golaha deegaanka Oslo muran iyo ciriiri magalin. Doorashadii ugu danbeysay ee 2015, waxa uu kaligiis helay codad ku dhow 4000.  Khaled Mahmood wixiisa kale ha walaaqdo, laakiin la iskuma hayo in ajaaniibta Norway ay diidmadiisii wax weyn ugu fadhido maanta. 

Hadaad rabto inaad waxbadan kasii ogaato mowduucan waxaad Google ku qortaa Khaled Mahmood og innvandrerregnskap 1996.

Siyaasiyiinta soomaalida ee maanta maxey ka baran karaan Khaled?

Hadii hal qof uu qorshe ay labo xisbi wataan burburiyey, maxey 40-ka xildhibaan ee soomaaliyeed ee kujiro golayaasha deegaanka magaalooyinka wadanka, qaban karaan hadey isku tagaan?. Ma ogyihiin awooda siyaasadeed oo ay ku fadhiyaan? 

[adsenseyu2]