Mahad Mire oo kamid ah siyaasiyiinta soomaaliyeed ee kujiro gudiyada xaafadaga Oslo, gaar ahaan xaafada Grünerløkka ayaa sheegay iney muhiim tahay in doorashadan soo socoto aysan soomaalida ku kadsoomin xisbiga ay codka siinayaan. Waxa uuna sheegay in bulshada soomaaliyeed ee Norway ku dhaqan ay u baahantahay iney wax weyn ka fahanto systemka siyaasada wadankan ee ku dhisan xisbiyada.
Mahad ayaa ka tirsan xisbiga bixixda xiga ee RØDT, waxa uuna doorashadii 2015 u tartamayay kamid noqoshada golaha deegaanka Oslo.
Mahad oo xiriir lasoo sameeyay warbaahinta NorSom News, ayaa sheegay in khaladka ugu weyn ee soomaalidu ay gasho xiliyada doorashada, ay tahay iney shaqsi iyo aqoon ay dadka codka ku siiyaan, iyaga oo aan waxbadan ka ogaan siyaasada xisbiga uu qofkaas matalayo. Wuxuuna ugu baaqey iney cashar ka qaataan doorooshooyinkii hore, sanadkana ay si fiican isha ugu hayaan siyaasada kala duwan ee xisbiyada, gaar ahaan mida ku wajahan danta guud ee bulshada soomaaliyeed.
Soomaalida ayaa ah qowmiyada sadexaad ee ugu badan ajaaniibta wadankan, sidoo kale waa qowmiyada ugu badan ajaaniibta ee dhiibata codadka xiliyada doorashada. Sidaas darteed waa muhiim in aan doorashadan aan lahaano, qorshe mideysan oo ku wajahan siyaasadaha kala duwan ee xisbiyada.
Mahad ayaa sheegay in soomaalidu ay u baahantahay iney darsaan oo ay fahmaan, dhamaan qodobada ay xisbiyadu ku galayaan doorashada, isla markaana ay codka siiyaan xisbigii ay u arkaan inuu ka shaqeynayo dan soomaaliyeed. Waxa uuna ugu baaqey soomaalida ineysan indhaha ka xirnaan oo hal xisbi codka isugu geyn, sidii horey u dhici jirtay.
Doorashada baarlamaanka Norway ayaa waxaa hada ka dhiman mudo 10 bilood ah, waxeyna xisbiyadu mar horeba bilaabeen magacaabista musharaxiinta u tartameysa jagooyinka baarlamaanka, iyaga oo dhawaan soo saari doona, qorshadooda ku aadan doorashadan dhici doonto sanadka fooda nagu soo hayo ee 2017.
Si kasta doorashada sanadka soo socoto ee 2017 ayaa noqon doonto mid masiiri ah, taas oo saameyn ku yeelan doonto bulshada soomaaliyeed ee ku dhaqan wadanka Norway.
[adsenseyu2]