Wasiirada arimaha soo galootiga iyo isdhexgalka bulshada Sylvi listhaug ayaa maanta sheegtay in ay wel-wel ku heyso caruurta loo diro dugsi quraanada dibada ah, iyada oo sheegtay iney dhaawici karto jaaniskooda ka qeybqaadashada suuqa shaqada Norway. 

Listhaug ayaa sheegtay inay doorbideyso in caruurtaas ay dhigtaan iskuulada sare ee Norway, si ay isugu diyaariyaan ka qeybqaadashada suuqa shaqada wadankan Norway. Waxeyna sheegtay in dugsi quraanada dibada loo aado, aysan caruurta ka saacideyn iney yeeshaan astaamo u fududeyna ka qeybqaadashada suuqa shaqada Norway. 

Hadalka wasiirada ayaa soo baxey,  kadib markii NRK uu warbixin ka diyaariyey masaajid ay leeyihiin koox turki ah, kaas oo gabdhaha qaarkood marka ay dhameeyaan fasalka 10-aad u dira dalalka Belgiumka iyo Turkiya, si ay halkaas ugu dhigtaan dugsi quraan una helaan aqoon kororsi diinta islaamka. 

Koox-diimeedka maamusha masaajidka ayaa sheegtay in arintan ay tahay howl ay waalidka gabdhaha dhaley ay raali ka yihiin, masaajidkuna uu kaliya ka yahay garwadeen, isla markaana uusan ku bixin wax taageero dhaqaalo ah. 

Sylvi Listhaug ayaa sidoo kale sheegtay ineysan ogeyn in arinta dirista caruurta ee dugsi quraanada dibada, ay ka qeybqaadan karto xagjirnimada. Waxeyna sheegtay inaan la dhayalsan karin arintaas, dowladuna ay diyaarisey qorshe ku saabsan xagjirnimada. 

Wasiirad Listhaug ayaa sheegtay inay war walbe mudnaanta siineyso in caruurta ku nool Norway ay kamid noqdaan mujtamaca norwiijiga ah, isla markaana ay lahaadaan astaamo ka kaalmeenaya iney ka qeybqaataan suuqa shaqada Norway. Waxeyna sheegtay in taasina ay khuseyso qof walba, diinta uu rabo ha heystee.

Listhaug ayaa wax laga weydiiyey caruurta loo diro dugsiyada lagu barto diinta masiixiga, iyo iney farqi u dhaxeeyaan labada dugsi-diimeed?

Waxey ku jawaabtey in muhiimadu ay tahay in caruurtu ay helaan astaamaha qofka laga rabo si uu uga qeybgalo suuqa shaqada Norway. Arintaas ay khuseyso dadka oo dhan, iyada oo aan loo eegeyn diintooda.

Xigasho/kilde: NRK [adsenseyu2]