Siyaasiga Abdullahi Allason oo kamid ah siyaasiyiinta soomaaliyeed ee ka tirsan xisbiga shaqaalaha ee Ap, ayaa sheegay inuusan isku soo sharixi doonin doorashada golaha deegaanka ee magaalada Kristiansand sanadka 2019. Allason ayaa shaley hadalkan ka sheegay kulan looga hadlayay ka hortaga xagjirka, oo ay soo qabanqaabisey hey-ada Grace Center, kaas oo ka dhacey magaalada Oslo.
-Siyaasi heer gobol/qaran
Abdullahi Allason ayaa sheegay in kursiga golaha deegaanka ee Kristiansand, uu rabo inuu u baneeyo dhalinyarada cusub ee soo kaceyso iyo dadka kale ee raba iney markooda is tijaabiyaan. Wuxuuna sheegay inuu isagu rabo inuu u gudbo siyaasad heer gobol ama qaran ah, maadaama uu golaha deegaanka Kristiansand mudo kamid ahaa.
Allason ayaa kamid ah siyaasiyiinta soomaaliyeed ee sida aadka ugu dhexmuuqdo siyaasada wadanka, gaar ahaan magaaladaas Kristiansand oo uu mudo degenaa. Si gaar ah, sanadadii ugu danbeeyay wuxuu Allason wax badan ka shaqeynayay arimaha la dagaalanka xagjirka. Wuxuuna kamid ahaa gudi gaar ah oo dowladu ay u xilsaartey, dajinta qorshe-qarameedka ka hortaga xagjireynta dhalinyarada.
[adsenseyu2]