Dadka magangalyada soo weydiista Norway ayaa sadexdii sano ee ugu danbeeyay si aad ah hoos u dhacay, hadana dowlada Norway ayaa wali ka digeysa in la badbaadiyo doomaha qoxootiga ee maraya badda u dhaxeysa Libya iyo Italy.
Wasiirka Cadaalada Norway Jøran Kallmyr, ayaa sheegay in hadii dadka caadiga ah iyo ururada samafalka ay badbaadiyaan doomaha qoxootiga, ay keeni karto kor u kac ku yimaada tirada Qoxootiga Yurub.
Wasiirka ayaa sheegay in badbaadinta qoxootiga ay keeni karto in dad badan ay kusoo dhiiradaan soo galitaanka badda, iyaga oo ku xisaabtamaya in la badbaadin doono.
Wuxuuna raaciyay in dowladiisu ay ka walaacsantahay badbaadinta doomaha qoxootiga ah.
SV: Waa wax lala yaabo
Lars Haltbrekken oo katirsan xisbiga SV, kana mid ah xubnaha baarlamaanka Norway, ayaa hadalka wasiirka ku tilmaamay mid lala yaabo.
Wuxuuna sheegay in badbaadinta doomaha tahriibka, aysan keeneyn korarka tirada qoxootiga. Balse ay tahay badbaadinta dad u baahan gargaar deg-deg ah.