Maxkamada EU-da ayaa go´aan ay soo saartay bilowgii bishan ku sheegtay in Denmark aysan sharci u haysan diidista qoysaska ay dadku ka joogaan Denmark, rabana inay dib u midoobaan.
Maxkamada ayaa go´aan ka gaartay kiiska haweenay u dhalatay dalka Turkiga, taas oo rabtay inay la midowdo qoyskeeda oo kunool Denmark.
Dowlada Denmark ayaa sanadkii 2009 haweenaydaas u diiday inay la midowgo qoyskeeda oo kunool Denmark, balse waxey kiiskeeda u gudbisay maxkamada midowga Yurub oo hada go´aan ka gaartay.
Dowlada Denmark ayaa diidmada haweenaydaas ku sababeysay in ninkeeda uu xiriir la adag la leeyahay dalka Turkiga, ayna fududahay inay Turkiga ku wada noolaadaan, intii ay Denmark ku midoobi lahaayeen mar kale.
14.000 codsi oo la diiday:
Denmark oo adeegsaneyso xeerkaas ayaa 15-kii sano ee u dhaxeysay 2003 ilaa 2018 diiday 14.000 codsi oo la xiriira qoysas raba inay dib u midoobaan.
Maxkamada EU-da ayaa hada sheegtay in xeerkaas uu yahay mid aan sharci aheyn.
Dowlada Denmark ayaa hada ka cabsi qabta in dib loo furo kumanaan kiis oo la xiriira qoysas raba inay dib u midoobaan. Kuwaas oo horey loogu diiday in la isku keeno.